Коалицијата „Вреди“ ја објави кандидатурата на Јакуп Хусеини за градоначалник на Општина Брвеница на претстојните локални избори.
Хусеини е магистер по правни науки и моментално работи како државен службеник во Општина Брвеница. Од „Вреди“ велат дека неговото професионално искуство и непосредната работа со жителите му овозможиле добро да ги запознае нивните потреби, проблеми и предизвици.
Според коалицијата, Хусеини во текот на професионалниот ангажман бил посветен на работата со граѓаните и на своите институционални обврски.
„Нашата предност е јасна: не губиме време со приспособување. Јакуп Хусеини ја познава Општината, администрацијата, процедурите и потребите на жителите. Затоа, уште од првиот ден може да биде во нивна служба и да започне со работа и конкретни одговорности“, соопшти „Вреди“.
Од коалицијата додаваат дека со кандидатурата нудат кандидат со правна подготовка, професионално искуство и непосредно познавање на Општина Брвеница.
„Од првиот ден, во служба на жителите на Брвеница“, порача „Вреди“.
