ВРЕДИ со документи тврди дека Груби ја одобрил продажбата на државните акции во Стопанска банка Битола

РЕДИ на прес-конференција обвини дека Артан Груби лично ја потпишал одлуката за продажба на државните акции во Стопанска банка Битола, тврдејќи дека овој потег бил дел од поширока операција поврзана со преземањето на банката од страна на српскиот бизнисмен Давор Мацура.

— реклама —

Од партијата велат дека како доказ ги објавуваат записникот од 158. седница на Владата, одржана на 6 јуни 2023 година, и одлуката објавена во „Службен весник“ број 123 од 13 јуни истата година. Според нив, на седницата, со која претседавале Димитар Ковачевски и тогашниот прв вицепремиер Артан Груби, присуствувале и тогашните министри Фатмир Бесими, Бујар Османи и Крешник Бектеши.

— реклама —

Под петтата точка од дневниот ред била разгледана информацијата за продажба на акциите во сопственост на Агенцијата за управување со одземен имот, а со заклучок број 6 била донесена одлука за согласност за продажба на државните акции во Стопанска банка Битола. ВРЕДИ посочува дека на одлуката со број 41-3733/8, објавена во „Службен весник“, стои потписот на Артан Груби.

Од партијата ја поврзуваат оваа одлука со претходно изнесените тврдења за компанијата „АС Сењак“, преку која, како што наведуваат, сватот на Али Ахмети купил акции во банката, додека поврзана компанија добила кредит од пет милиони евра од „Алта банка“ во Белград.

— реклама —

Според ВРЕДИ, државните акции што биле ставени на продажба со одлуката на Владата, заедно со приватните акции на „АС Сењак“, на крајот завршиле кај Давор Мацура, со цел преземање на банката. Партијата тврди дека трите настани се делови од иста операција, во која биле вклучени политички и деловни структури поврзани со ДУИ.

— реклама —

Од ВРЕДИ упатија прашања до Али Ахмети, Фатмир Бесими и Бујар Османи, меѓу кои и дали уште во јуни 2023 година постоел план банката да се подготви за преземање од страна на „Алта банка“ од Белград. Побараа одговор и за улогата на тогашните владини функционери во одобрувањето на продажбата на државните акции.