Јанчев од „Тиквешки гроздобер“: „Да ја чуваме традицијата, но и да создадеме услови за нејзин развој“

Градоначалникот на Кавадарци, Митко Јанчев, порача дека „Тиквешкиот гроздобер“ не е само традиционална прослава, туку и можност за промоција на Кавадарци и Тиквешијата, развој на туризмот и поддршка на локалното стопанство.

Во обраќањето на свеченоста во Винскиот музеј, Јанчев ги поздрави претставниците на државните институции, дипломатскиот кор, гостите и соработниците што присуствуваат на манифестацијата.

— реклама —

„Тиквешкиот гроздобер е една од најзначајните традиционални манифестации во Тиквешијата и Кавадарци. Тој е посветен на лозарите и винарите, но истовремено претставува можност за промоција на нашиот град, нашиот регион и неговите потенцијали“, рече Јанчев.

— реклама —

Тој истакна дека лозарството и производството на вино се длабоко поврзани со животот на Тиквешијата и дека генерации кавадарчани го вложувале својот труд во создавањето на препознатливите тиквешки вина.

Според Јанчев, обврска е традицијата да се зачува, но и да се создадат услови за нејзин понатамошен развој.

— реклама —

„Тиквешкиот гроздобер не треба да го гледаме само како традиционална прослава, туку и како можност за промоција на Кавадарци, за развој на туризмот, за поддршка на локалното стопанство и за создавање нови соработки и пријателства“, порача градоначалникот.

Тој изрази задоволство што на манифестацијата присуствуваат гости од различни места, оценувајќи дека ваквите настани придонесуваат за поврзување на луѓето, институциите и градовите.

На крајот од обраќањето, Јанчев наздрави за успешен „Тиквешки гроздобер“, добрата соработка и пријателството, како и за поддршката од Владата, Министерството и институциите за Тиквешкиот регион, лозарството и винарството.