Јапонија не се откажува од руските нафта и гас и покрај плановите за намалување на зависноста

Јапонија планира постепено да ја намалува зависноста од руската нафта и јаглен, но нема да се повлече од нафтените и гасните проекти „Сахалин 1“ и „Сахалин 2“, кои ги смета за важни за својата енергетска безбедност.

— реклама —

Во годишниот извештај за надворешната политика, јапонското Министерство за надворешни работи ја нагласува стратешката важност на двата проекта и најавува дека земјата ќе ги задржи своите удели за да обезбеди стабилно снабдување со енергенси на среден и долг рок.

— реклама —

Во 2025 година, течниот природен гас од проектот „Сахалин 2“ сочинувал 8,6 отсто од вкупниот увоз на овој енергенс во Јапонија, со што Русија била трет најголем снабдувач. Од истиот проект, кој е изземен од западните санкции, Јапонија во првата половина од годината увезла околу 1,53 милиони барели нафта. Јапонските купувачи во моментов не набавуваат нафта од „Сахалин 1“.

— реклама —

Проектот „Сахалин 1“ опфаќа три нафтени и гасни полиња во близина на североисточниот брег на рускиот остров Сахалин. По руската инвазија врз Украина и најавата за повлекување на „ЕксонМобил“ од Русија, во октомври 2022 година управувањето со проектот премина на истоимената руска компанија. Во сопственичката структура учествуваат руски компании, јапонската државна енергетска компанија СОДЕКО, индиската ОНГЦ и „ЕксонМобил“.

„Сахалин 2“, пак, ги опфаќа нафтените и гасните полиња во Охотското Море и постројката за производство на течен природен гас на југот од островот. Во 2025 година, нејзиниот производствен капацитет достигнал 10,3 милиони тони годишно. Со проектот управува компанијата „Сахалин Енерџи“, во чија сопственичка структура се рускиот „Газпром“ и јапонските компании „Мицуи“ и „Мицубиши“.