Јапонија петти ден по ред се соочува со температури над 40 степени

Јапонија и денеска се соочува со екстремен топлотен бран, при што температурите петти ден по ред надминуваат 40 Целзиусови степени.

— реклама —

Највисока температура од 40,2 степени е измерена во градот Кувана, во префектурата Мије, во централниот дел на земјата. Според локалните медиуми, ова е најдолгата низа денови со температури над 40 степени откако во 2010 година почнало систематското водење на вакви податоци.

— реклама —

Поради жештините, предупредувања се издадени за 37 од вкупно 47 јапонски префектури. Температури од 39 степени и повеќе се регистрирани и во префектурите Аичи, Гифу и Вакајама.

Јапонската метеоролошка агенција соопшти дека ведрото време дополнително придонесува за пораст на температурите. На граѓаните им се препорачува да престојуваат во климатизирани простории, редовно да внесуваат течности и минерали, како и да избегнуваат подолг престој на отворено.

— реклама —

Во исто време, топол и влажен воздух носи обилни врнежи во североисточниот регион Тохоку и во префектурата Ниигата. До недела во овие области се очекуваат поројни дождови, при што количината на врнежи може да достигне до 120 милиметри во Тохоку и до 100 милиметри во Ниигата.

Метеоролозите предупредуваат на опасност од свлечишта, поплави во пониските подрачја, излевање на реки, како и појава на грмежи и силни налети на ветер.