Јапонија во мај купила повеќе од 300.000 барели руска нафта, користејќи исклучок од западните санкции за да ги надомести намалените испораки од Блискиот Исток, објави руската новинска агенција ТАСС, повикувајќи се на податоци од јапонското Министерство за финансии.
Според објавените информации, јапонските компании купиле околу 58.000 кубни метри руска нафта, што одговара на приближно 364.800 барели. Вредноста на набавувањето изнесувало шест милијарди јени, односно околу 32,3 милиони евра.
Нафтата е набавена во рамките на проектот „Сахалин 2“ на рускиот Далечен Исток, кој е поврзан со испораките на течен природен гас и е изземен од дел од западните санкции воведени кон Русија.
Податоците покажуваат дека во април Јапонија не набавувала руска нафта, што значи дека мајската набавка претставува обновување на овие испораки.
„Сахалин 2“ е еден од најголемите руски енергетски проекти и е во сопственост на рускиот „Гаспром“, заедно со јапонските компании „Мицуи“ и „Мицубиши“. Нафтата од овој проект е изземена и од ограничувањето на цената што го воведоа земјите од Г7 за руските испораки.
Според пресметките на ТАСС, просечната цена на руската нафта што Јапонија ја купила во мај достигнала околу 103 долари за барел, што е значително над ограничувањето од 60 долари што Г7, Европската Унија и Австралија го воведоа кон крајот на 2022 година.
По почетокот на војната во Украина во 2022 година, Токио го намали увозот на руска нафта, но јапонските компании повремено набавуваат ограничени количини од проектот „Сахалин 2“, поради енергетската важност на овој извор за земјата.
Со оглед на тоа што повеќе од 90 проценти од јапонскиот увоз на нафта доаѓа од земјите од Персискиот Залив, Токио активно бара дополнителни извори за снабдување, особено во услови на зголемени ризици и нарушувања на испораките од Блискиот Исток.
