Јапонија во јуни увезла речиси 1,2 милиони барели руска нафта, што е трипати повеќе во споредба со претходниот месец, покажуваат податоците на јапонското Министерство за финансии. Зголемениот увоз укажува на обид на Токио да ги надомести намалените испораки од Блискиот Исток.
Според официјалните податоци, во јуни од Русија биле увезени 184.000 кубни метри нафта, што одговара на околу 1,157 милиони барели. Вредноста на увозот изнесувала 19,69 милијарди јени, односно околу 120,8 милиони американски долари.
Тоа значи дека јапонските увозници во просек плаќале нешто повеќе од 104 долари за барел руска нафта.
Во мај, Јапонија увезла нешто помалку од 365.000 барели руска нафта во вредност од околу шест милијарди јени, додека во април воопшто немало увоз на руска нафта.
Според руската агенција ТАСС, нафтата увезена во мај и јуни потекнува од проектот „Сахалин 2“ на рускиот Далечен Исток, кој не е опфатен со западните санкции. Проектот е еден од најголемите руски извозни проекти за природен гас, а негови сопственици се руски „Газпром“ и јапонските компании „Мицуи“ и „Мицубиши“.
Нафтата од „Сахалин 2“ е изземена и од ограничувањето на цената што го воведоа земјите од Г7 за рускиот извоз на нафта. Во моментов, ограничувањето изнесува 44,10 долари за барел, а земјите од Г7, Европската Унија и Австралија најавија санкции за осигурителните компании и превозниците кои ќе учествуваат во транспорт на поскапа руска нафта.
По почетокот на војната во Украина во 2022 година, Јапонија го запре увозот на руска нафта, но повремено, по барање на јапонската влада, домашните компании набавуваат ограничени количини од проектот „Сахалин 2“, поврзани со испораките на течен природен гас.
Со оглед на тоа што повеќе од 90 проценти од јапонскиот увоз на нафта доаѓа од земјите околу Персискиот Залив, Токио интензивно бара алтернативни извори на снабдување, иако Русија засега не е официјално наведена како долгорочна алтернатива.
