Јаревски: Инвестиција во рударскиот сектор во Македонија ќе претставува можност за трансфер на најсовремени технологии и развој на целокупната држава

Тони Јаревски, пратеник од редовите на ВМРО-ДПМНЕ на гостување во емисијата Топ Тема на Телма телевизија се осврна на најавата за отварање на рудник за антимон во кривопаланечко, кој ќе биде американска инвестиција во рамки на стратешкото партнертство и укажа дека моментално се изготвува стратегија и студија преку која ќе се разгледува какви се потенцијалите на овој рудник. Тој додаде дека конкретно за овој случај, добро е што имаме сериозен партнер, којшто произлегува од еден сериозен стратешки дијалог со нашиот стратешки партнер, потенцирајќи дека односот кон ова прашање е на максимално сериозно ниво.

„Ова ни е пред се можност за трансфер на know-how, на нови технологии, како што кажавте, за жал, 40 години немаме нов рудник во Македонија, добар дел од технологиите и од знаењата и практиките кои се применуваат, сега се на некој начин застарени, ова ќе биде можност да се имплементираат новитети коишто ќе допринесат и на поширокото рударство и она што го укажува и самата стратегија, тие го гледаат како мотор, како основа за развојот во наредните 20 години и нивните потенцијали“, укажа Јаревски и додаде:

„Токму овој пример, со овој рудник, доколку студијата покаже дека има исплатливост, дека има начин за одржлива експлоатација, верувам во самите студии ќе бидат опфатени и најновите и најсовремените методологии или технологии коишто ќе можат за прв пат да бидат применети во Македонија, каде што ризикот од истекување, или загадување на подземните води, почвата и воздухот ќе бидат сведени на апсолутен минимум“.

Јаревски нагласи дека инвестиција во рударскиот сектор во Македонија ќе претставува можност за за трансфер на најсовремени технологии и развој на целокупната држава.

„Очекувам дека ќе имаме трансфер на најсовремени технологии, ова ќе биде можност за самиот регион и нешто што ќе може да направи еден чекор нанапред кон развојот на целокупната држава. Се разбира, за тоа треба да имаме и консензус како општество, да се движиме во насока, да се соочиме со самиот предизвик, да ги видиме можностите и сите заеднички да го поддржиме процесот во насока да извлечеме апсолутен бенефит, а ризиците и опасностите да ги сведеме на апсолутен минимум“, дециден е пратеникот Јаревски.