Пратеникот од ВМРО-ДПМНЕ, Тони Јаревски, на денешната седница на Комисијата за финансирање и Буџет изјави дека ребалансот на Буџетот ќе придонесе за натамошно намалување на невработеноста и за поголема поддршка на бизнис-заедницата.
Тој посочи дека економските показатели, според него, укажуваат на позитивни движења, нагласувајќи дека во првиот квартал е остварен раст на БДП од 3,1 процент, со очекувања до крајот на годината тој да достигне 3,5 проценти.
„Оваа недела бевме сведоци дека Македонија забрзува. Имаме податоци за раст на БДП од 3,1 проценти, а сите анализи укажуваат дека до крајот на годината тој може да достигне 3,5 проценти. Вкупните приходи се зголемуваат, како и расходите, благодарение на поголемата ефикасност на институциите“, рече Јаревски.
Тој истакна дека Владата преку ребалансот продолжува со мерките за поддршка на вработувањето и самовработувањето.
„Денес имаме 18.000 нови работни места и невработеност од 11,3 проценти. Со мерките што се предвидени во ребалансот очекуваме таа дополнително да се намалува. Голем интерес има и за Оперативниот план, со повеќе од 3.000 апликации за самовработување“, изјави Јаревски.
Тој додаде дека преку државната поддршка младите до 29 години можат да добијат до 10.000 евра за започнување сопствен бизнис, односно до 14.000 евра доколку аплицираат две лица заедно, а мерките се достапни и за лица постари од 29 години кои имаат бизнис-идеја.
Според Јаревски, целта на Владата е да создаде услови граѓаните да основаат и развиваат сопствен бизнис, наместо да зависат од социјални мерки.
