Комисијата за одбрана и безбедност при Собранието денеска ќе одржи јавна расправа по Предлог-законот за оружје, со кој се предлагаат измени и дополнувања на постојната законска рамка во оваа област.
Со предложените решенија се уредуваат условите за набавување, поседување, носење и пренесување оружје, како и неговото чување, производство, поправање, деактивирање, промет и посредување. Законот ги опфаќа и прашањата поврзани со трансферот, превозот, претоварот и пренесувањето преку државната граница на оружје, неговите составни делови и муниција.
Од Собранието посочуваат дека целта е да се унапредат постојните законски решенија и да се надминат практичните предизвици со кои се соочува Министерството за внатрешни работи како надлежен орган.
Воедно, предвидено е националната регулатива да се усогласи со релевантните европски и меѓународни стандарди, вклучително и директивите и регулативите на Европската Унија, како и протоколите на Обединетите нации што се однесуваат на контролата на огненото оружје.
На јавната расправа се поканети претставници на институции, организации и експерти од областа на одбраната и безбедноста, кои ќе имаат можност да ги изнесат своите ставови, забелешки и предлози во однос на предложените законски измени.
