Јавниот долг на Франција продолжува да расте и се очекува во 2026 година да достигне 119,3 отсто од бруто домашниот производ, а во 2027 година да се искачи на 121,7 отсто, соопшти француското Министерство за економија и финансии.
Според податоците на Националниот институт за статистика и економски студии, тоа би биле највисоките нивоа на јавен долг во Франција од 1995 година. Во првиот квартал од 2026 година, долгот изнесувал 117,5 отсто од БДП, односно 3.536,1 милијарди евра.
Од Министерството оценуваат дека растот на долгот е директна последица на постојано високиот буџетски дефицит, кој за 2026 година се очекува да изнесува 5,4 отсто од БДП, наместо претходно планираните 5 проценти.
Франција во моментов има највисок јавен долг во еврозоната по Грција и Италија. Дополнителен притисок создаваат повисоките каматни стапки, при што Франција моментално се задолжува по стапка од 4,56 отсто, што е за еден процентен поен повеќе од Германија.
Францускиот премиер Себастијан Лекорни најави план за заштеда од 54 милијарди евра во буџетот за 2027 година. Без мерките за заштеда, според проценките на Владата, јавниот дефицит би можел да достигне речиси 6,5 отсто од БДП.
Нацрт-буџетите за 2027 година треба да бидат претставени пред Советот на министри на 1 октомври, по што ќе следи нивно разгледување во францускиот парламент.
