Како е спроведена набавката на електрични броила која се најде во партиски препукувања деновиве?

Договорот за набавка на електрични броила вреден 13,2 милиони евра, кој деновиве стана предмет на партиски препукувања, е спроведен според законските процедури и однапред утврдени технички и професионални критериуми, тврдат од ЕВН Македонија.

По обвинувањата на СДСМ кон Владата поврзани со најновиот договор за набавка на електрични броила и најавата на министерката за енергетика Сања Божиновска дека ќе преземе правни мерки за заштита на честа, угледот и професионалниот интегритет, побаравме став од ЕВН Македонија за начинот на кој била спроведена постапката.

— реклама —

Од компанијата велат дека сите нивни набавки се спроведуваат низ јасно утврдена постапка, со почитување на законските процедури и специфичните технички критериуми.

„Таквата пракса беше применета и во постапката за набавка на броила, каде што, покрај законската регулатива, беа доследно применети и критериумите за техничка и професионална способност, усогласеноста со барањата од техничката спецификација, како и проверката за евентуално постоење причини за исклучување на понудувачите од постапката“, велат од ЕВН Македонија.

— реклама —

Од компанијата тврдат дека, земајќи ги предвид овие проверки, изборот на понудувачот бил направен со строго почитување на утврдените критериуми и регулативи.

„Од ЕВН нагласуваат дека изборот на понудувачот е резултат исклучиво на спроведената постапка и на исполнувањето на однапред утврдените критериуми и барања, без простор за политички или други толкувања поврзани со изборот“, додаваат од компанијата.

— реклама —

ЕВН ја поврзува набавката со поширокиот инвестициски циклус за модернизација на електродистрибутивната мрежа и подобрување на услугите.

Во рамките на тој процес, според компанијата, се реализираат повеќе активности – далечинско управување со трафостаниците, унапредување на софтверските решенија за управување и замена на електричните броила.

— реклама —

„Промената на броилата е дел од процесот за целосно усогласување на дистрибутивниот систем со стандардите на Европската Унија и истиот интензивно се спроведува со години наназад, а ќе продолжи и во следниот период“, додаваат од ЕВН.

Одговорот на компанијата доаѓа во период кога набавката од 13,2 милиони евра е во центарот на политичка расправа. ЕВН, од своја страна, тврди дека станува збор за редовна набавка поврзана со модернизацијата на мрежата и дека изборот бил направен согласно утврдените правила.