Откриена кражба на струја во казино во Кичево, штетата над 2,7 милиони денари

Специјализиран тим на „Електродистрибуција“ открил неовластено користење електрична енергија во казино на улицата „Магистрален пат“ во Кичево, при што била утврдена манипулација со две електрични броила.

— реклама —

Од компанијата информираат дека случајот бил откриен по детални анализи на потрошувачката и следење на користењето на електричната енергија. При теренската контрола било забележано невообичаено работење на мерните уреди и абнормално зуење во мерниот ормар.

— реклама —

Со мерењата била регистрирана фреквенција од 225 до 340 херци, наместо стандардните 50 херци. Според „Електродистрибуција“, бил користен уред за манипулација со фреквенции, набавен на црниот пазар, со кој било овозможено делумно или целосно да не се регистрира реално потрошената електрична енергија на двете мерни места.

— реклама —

За случајот е составен записник за неовластено користење, а до Министерството за внатрешни работи е поднесена пријава за неовластено преземање електрична енергија, согласно член 235-а од Кривичниот законик.

— реклама —

За двете мерни места се изготвени посебни фактури за надомест на штетата, во вкупен износ од 2.722.798 денари.