Калајџиев за новата истрага против Дејан Јованов: Ако е отворена само за да се изигра рокот за притвор, тоа е злоупотреба на правото

Професорот по право Гордан Калајџиев реагира на отворањето нова истрага против сопственикот на дискотеката „Пулс“, Дејан Јованов, непосредно пред истекувањето на законскиот рок за неговиот притвор во предметот за пожарот во Кочани. Според Калајџиев, доколку новата истрага е отворена вештачки само за да се овозможи продолжување на лишувањето од слобода, станува збор за злоупотреба на правото.

„Отворање вештачки нова истрага само за да се изигра законот е злоупотреба на правото! На рокот обвинителите требало да мислат кога за пожарот обвинија кого стигнаа! Судот треба да го отфрли тој предлог ако има правна држава“, вели Калајџиев.

Реакцијата следува откако Основното јавно обвинителство за гонење организиран криминал и корупција отвори истрага против Јованов поради сомнение за давање поткуп и побара да му биде определен нов притвор.

— реклама —

Според Обвинителството, Јованов е осомничен дека дал поткуп на службено лице во Министерството за економија за да му биде обезбедена лиценца за вршење угостителска дејност, без да поднесе барање и иако, според обвинителските наводи, знаел дека објектот не ги исполнува законски пропишаните услови.

ОЈО ГОКК образложи дека барањето за притвор е поднесено поради опасност од бегство, но и поради фактот што против Јованов веќе се води друга кривична постапка за тешки дела против општата сигурност.

— реклама —

„Осомничениот до сега беше обезбеден како обвинет во друга постапка. Но, со оглед на тоа што во однос на тоа дело истекуваат законските рокови за обезбедување, а јавниот обвинител од ОЈО ГОКК продолжува да прибира докази во однос на дејствијата на поткуп, тој процени дека ризиците за обезбедување на осомничениот се големи и побара да му биде определена притворска мерка“, соопшти Обвинителството.

Токму ова образложение го отвори прашањето дали новата постапка и новото барање за притвор фактички ќе овозможат Јованов да остане во притвор и по истекувањето на максималниот рок во првиот предмет.

На Јованов на 3 октомври му истекува едногодишниот притвор во предметот за пожарот во „Пулс“. Неговата одбрана претходно најави дека ќе понуди гаранција во имот и ќе бара мерки на претпазливост со кои би се обезбедило неговото присуство во понатамошниот тек на судската постапка.

— реклама —

Од Обвинителството, од друга страна, оценуваат дека притворот е неопходен.

„Јавното обвинителство оценува дека притворот е апсолутно неопходна мерка за обезбедување на присуството на овој осомничен, ценејќи ги сите околности и основи“, наведоа оттаму.

Обвинителството соопшти и дека службеното лице кое, според сомнението, го примило поткупот веќе е обвинето и против него се води судска постапка за примање поткуп.

За предлогот на ОЈО ГОКК за определување притвор треба да одлучи Основниот кривичен суд Скопје.

Јованов е меѓу обвинетите и во судскиот процес за пожарот во дискотеката „Пулс“ во Кочани, во кој на 16 март 2025 година загинаа 63 лица, а повеќе од 200 беа повредени. Постапката за пожарот е во тек.