Калифорнија и уште шест сојузни држави ја тужат администрацијата на Трамп поради кратење на одобрените средства

Калифорнија и уште шест американски сојузни држави поднесоа тужба против администрацијата на претседателот Доналд Трамп, оспорувајќи ја одлуката за задржување на средства што Конгресот претходно ги одобрил.

— реклама —

Станува збор за околу 810 милиони долари, кои Белата куќа се обидела да ги поништи пред крајот на фискалната година. Администрацијата на Трамп минатата недела побарала да не се трошат одобрени средства наменети за имиграција, расни прашања и образование.

Тужбата е поднесена пред окружниот суд во Калифорнија, а ја предводи калифорнискиот јавен обвинител Роб Бонта. Во неа се тврди дека одбивањето на администрацијата да ги потроши средствата што претходно биле одобрени го нарушува уставниот принцип на поделба на власта и други уставни одредби.

— реклама —

„Само затоа што на претседателот не му се допаѓа програмата, тоа не значи дека може да ги укине средствата за неа“, изјавил Бонта.

— реклама —

Според американскиот Устав, Конгресот има надлежност за одобрување на јавните средства. Белата куќа, пак, минатата недела соопшти дека програмите финансирани со тие средства поттикнуваат незаконска имиграција, расни тензии и непотребни стравувања поврзани со животната средина.

Сојузните држави во тужбата тврдат дека постапките на администрацијата на Трамп го поткопуваат правото на Конгресот да управува со федералниот буџет.

Случајот отвора нов правен спор околу границите на претседателските овластувања кога станува збор за трошењето на средствата од федералниот буџет.