Калифорнискиот гувернер Гевин Њусом потпиша пакет закони со кои се воведуваат нови правила за употребата на вештачката интелигенција на работните места, со фокус на ризиците за работниците, меѓу кои губењето на работните места и надзорот на вработените.
Со новите правила на работодавачите им се забранува да користат технологија за проценување на емоционалната состојба на работниците врз основа на биометриски податоци. Компаниите исто така ќе мора писмено да ги известат вработените доколку вештачката интелигенција е причина за масовни отпуштања.
Дополнително, не е дозволено одлуките за отпуштање да се носат исклучиво врз основа на одлука донесена од вештачка интелигенција.
Њусом потпиша и извршна наредба со која од државните агенции се бара и понатаму да го користат терминот „вештачка интелигенција“, наместо „суперинтелигенција“, термин кој неодамна им бил наложен на американските дипломати од претседателот Доналд Трамп.
„Вештачката интелигенција треба да создава можности, а не да им наштетува на работниците и нивните семејства. Додека оваа технологија ги менува работните места, Калифорнија го става човекот во центарот“, изјавил Њусом.
Гувернерот истовремено го критикувал Трамп поради тоа што, според него, на федерално ниво не се воведени сеопфатни правила за вештачката интелигенција. Тој посочил дека и претставници на технолошкиот сектор предупредуваат на ризиците поврзани со оваа технологија.
Трамп неодамна соопшти дека водечки претставници од технолошкиот сектор потпишале доброволен договор за саморегулација на развојот на вештачката интелигенција.
Њусом претходно овој месец потпишал и закон со кој операторите на четботови со вештачка интелигенција се обврзуваат да направат проценка на ризиците пред нивното пуштање во употреба. Со друга извршна наредба државата се обврзала да се консултира со стручни лица со цел подобрување на надзорот над индустријата.
„Мораме да направиме многу повеќе бидејќи изостанува раководењето на федерално ниво“, рекол Њусом, додавајќи дека не ја исклучува можноста за свикување вонредна седница на законодавниот дом за дополнително разгледување на ова прашање.
На прес-конференцијата Њусом се осврнал и на законите поврзани со локалните медиуми. Тој потпишал закон за даночни олеснувања за локалните медиуми, вклучително и весници, дигитални портали и телевизиски станици, со цел да им се помогне при вработувањето и задржувањето новинари.
Гувернерот притоа ги критикувал потезите што ги смета за напад на слободата на медиумите од страна на Трамп, посочувајќи ја и одлуката на претседателот на одредени медиумски куќи да им го ограничи пристапот до Белата куќа.
Њусом зборувал и за претстојните избори за Конгресот, од кои ќе зависи која партија ќе има контрола врз Претставничкиот дом. Тој веќе се вклучил во политичката борба околу изборните единици и повеќепати истакнал дека изборите во ноември се од големо значење за неговата партија.
На прашањето дали поставил рок за одлука околу можна претседателска кандидатура во 2028 година, Њусом не дал директен одговор, туку рекол дека „моментот ќе дојде кога ќе дојде“.
