Канализациска цевка пукна во Пефкохори, властите забранија капење

Туристите кои престојуваат во Пефкохори на Халкидики добија предупредување да не влегуваат во морето на дел од плажата Акротири, откако локалните власти воведоа привремена забрана за капење поради истекување на канализациски води.

— реклама —

Општина Касандра донела одлука за забрана на капење на локацијата „Акротири“, откако дошло до пукање на канализациски цевковод и излевање на отпадни води во морето. Според грчките медиуми, мерката е превентивна и ќе остане во сила сè додека не бидат завршени лабораториските анализи за квалитетот на морската вода.

— реклама —

Забраната се однесува на јасно дефинирана зона од 200 метри од двете страни на местото каде што се случило истекувањето и не важи за целото крајбрежје во Пефкохори.

Надлежните служби веднаш интервенирале на терен, го санирале дефектот и спровеле активности за чистење и дезинфекција на погодената област. Сепак, конечната одлука за повторно отворање на плажата ќе биде донесена дури по добивањето на резултатите од анализите и потврда дека водата е безбедна за капење.

— реклама —

На туристите и локалното население им се препорачува да ги следат известувањата на локалните власти и да не влегуваат во морето во обележениот дел од плажата додека забраната официјално не биде укината.

— реклама —

За инцидентот се известени и надлежните здравствени и еколошки служби на регионалната единица Халкидики, кои го следат развојот на ситуацијата.