Капетан Драган: „Ова е усташка победа, ќе ја рушат државата“ - ќе се се зачленува во партијата на Вучиќ

Драган Васиљковиќ, познат како Капетан Драган, кој во Хрватска е правосилно осуден на 13 и пол години затвор за воени злосторства, ја нарече изборната победа на студентската листа во Србија „усташка победа“ и најави дека ќе се зачлени во Српската напредна странка (СНС) на Александар Вучиќ.

Во гостување на телевизијата „Информер“, Васиљковиќ тврдеше дека добил порака од Хрватска според која таму изборниот пораз на Вучиќ се прославувал како сопствена победа.

„Јасно е дека ова е усташка победа“, изјави Васиљковиќ, без да понуди докази за таквото тврдење.

— реклама —

Тој се осврна и на вчерашниот упад на граѓани во просториите на телевизијата „Информер“, при што беше прекинато емитувањето на програмата и дојде до судири меѓу дел од присутните и полицијата.

„Оние што упаднаа во Информер беа или пијани, или дрогирани или ментално ограничени. Нив ги сакаат нашите непријатели бидејќи лесно можат да манипулираат со нив“, рече Васиљковиќ.

Иако противниците на Вучиќ победија на изборите, тој ги обвини дека се обидуваат да ја урнат државата.

„Остварија победа, а наместо да слават, да се радуваат и да составуваат влада, тие ја рушат оваа држава. Она што се случи вчера е рушење на државата“, изјави тој.

— реклама —

Васиљковиќ побара апсење и строги казни за учесниците во инцидентот во „Информер“.

„Имаме снимки од тие луѓе, знаеме кои се тие луѓе, кои се сторителите. За државата да опстане, тие луѓе мора да бидат уапсени. Мора да бидат осудени, и тоа на такви казни што ќе спречат повторување на вакви работи“, порача тој.

Во настапот го бранеше и Вучиќ од критиките што се однесуваат на неговото семејство, тврдејќи дека нападите врз неговата мајка и децата се спротивни на обвинувањата дека тој е диктатор.

— реклама —

Потоа најави дека првпат во животот ќе стане член на политичка партија, и тоа токму на СНС, која ги загуби изборите.

„Како што реков, до денес не сум бил член на ниту една партија. Денес се зачленувам во СНС и ќе бидам многу активен член бидејќи само таму гледам организација и сила“, изјави Васиљковиќ, нарекувајќи ги политичките противници на Вучиќ „олоши“.

Водителката на „Информер“ му посочи дека одлуката ја соопштува токму на денот кога СНС ја одбележува својата партиска слава.

Драган Васиљковиќ за време на војната во Хрватска организирал и обучувал специјални единици на српските бунтовници на окупираните хрватски територии. Бил командант на единица за специјални намени, чии припадници биле познати како „Книнџи“.

Жупанискиот суд во Сплит во 2017 година го осуди на 15 години затвор за воени злосторства врз хрватски заробеници и цивили. Врховниот суд на Хрватска во 2018 година ја намали казната на 13 години и шест месеци.

Правосилната пресуда се однесува на злосторства извршени во 1991 година, вклучително и малтретирање и мачење заробеници во Книнската тврдина, како и негово учество во нападот врз Глина и околните населени места.

По војната живеел во Австралија под името Даниел Снеден. По долга постапка за екстрадиција, во јули 2015 година бил предаден на Хрватска, а од затвор излегол во март 2020 година, откако во казната му било пресметано и времето поминато во притвор.