Доколку една од целите е зачувување на здравјето на срцето, лекарите често советуваат да се намали внесот на црвено месо и почесто да се избираат поздрави извори на протеини. Според кардиолозите, лососот е еден од најдобрите избори.
Кардиологот д-р Хедер Џонсон и д-р Нина Редфорд истакнуваат дека лососот содржи мала количина заситени масти, а е богат со омега-3 масни киселини, кои можат да помогнат во намалувањето на нивото на лошиот холестерол и во заштитата на кардиоваскуларниот систем.
Според д-р Џонсон, лососот има пониско ниво на заситени масти во споредба со говедското и свинското месо, што може да придонесе за намалување на LDL, односно т.н. лош холестерол. Д-р Редфорд додава дека најголемиот дел од мастите во лососот се незаситени масти, кои се корисни за здравјето на срцето.
„Лососот содржи многу малку заситени масти. Најголемиот дел од неговите масти се незаситени и здрави за срцето, особено омега-3 масните киселини како EPA и DHA“, објаснува д-р Редфорд.
Експертите посочуваат дека замената на производите богати со заситени масти со лосос може да помогне во намалување на воспалителните процеси, ризикот од создавање згрутчувања на крвта и да ја подобри функцијата на крвните садови. Поради тоа, Американското здружение за срце препорачува консумирање најмалку две порции риба неделно.
Истражувањата покажуваат дека редовната консумација на лосос може да придонесе за намалување на вкупниот и LDL холестеролот, а умерено да го зголеми HDL, односно добриот холестерол. Дополнително, омега-3 масните киселини можат да помогнат и во намалување на триглицеридите, со што се намалува ризикот од срцеви заболувања.
Сепак, кардиолозите предупредуваат дека лососот не е чудотворно решение и дека најдобри резултати се постигнуваат кога е дел од урамнотежена исхрана и здрав начин на живот.
„Лососот е здрав извор на протеини, но треба да се комбинира и со други здрави извори, како што се немасно пилешко, мисиркино месо и растителни протеини, додека внесот на црвено месо треба да биде ограничен“, советува д-р Џонсон.
Според неа, првите позитивни промени во нивото на холестерол може да се забележат по шест до дванаесет недели, доколку исхраната е урамнотежена и ако лицето редовно практикува физичка активност.
