Карпош собра 3.5 тони стара облека и текстилен отпад

Околу три и пол тони стара облека и текстилен отпад досега се собрани преку специјалните контејнери поставени на повеќе локации во Општина Карпош.

— реклама —

Инспекциските служби на Општина Карпош одржаа работна средба со колективниот постапувач „Еко Текс – Груп“ од Скопје, на која беше разгледана досегашната реализација на активностите за собирање текстилен отпад, согласно договорот склучен во мај 2025 година.

Контејнери за текстилен отпад се поставени во сите десет основни училишта на територијата на општината, во десетте градинки, како и пред административната зграда на Општина Карпош.

— реклама —

Досега на овие собирни места се собрани околу 3.500 килограми стара облека и текстилен отпад, што од Општината го оценуваат како значаен резултат и показател за зголемената свест кај граѓаните за правилното управување со отпадот.

— реклама —

Поради успешноста на акцијата, Општина Карпош и „Еко Текс – Груп“ ќе ја продолжат соработката и во наредниот период.

Од Општина Карпош ги повикуваат граѓаните стариот текстил да го одлагаат исклучиво во поставените контејнери, со што, како што посочуваат, заеднички се придонесува за почиста животна средина и поодговорно управување со отпадот.

Селектирајте. Одложувајте одговорно. Да ја чуваме животната средина заедно.