Ким ги отвори вратите и за Путин и за Си, почнува борбата за влијание врз Северна Кореја

Северна Кореја отвори два важни гранични премини кон Кина и Русија, во период кога лидерот Ким Џонг Ун ги зајакнува односите со Москва, што отвора прашања за влијанието на двете големи сили врз Пјонгјанг.

Новиот мост на реката Јалу, кој го поврзува кинескиот град Дандонг со севернокорејскиот Синуиџу, беше отворен на 15 октомври. Мостот има четири сообраќајни ленти и е долг три километри. Се очекува да го растовари сообраќајот на блискиот, дотраен Мост на пријателството.

— реклама —

Отворањето следуваше околу еден месец по пуштањето во употреба на уште еден голем граничен премин, овојпат меѓу Северна Кореја и Русија. Првиот патен мост преку нивната кратка заедничка граница, наречен мост „Јаков Новиченко“, наводно предизвикал нелагодност кај кинеските претставници, особено поради сè поочигледните сигнали дека Ким Џонг Ун им дава предност на односите со Москва.

— реклама —

„Интересот на Кина да го зајакне своето влијание во Северна Кореја дополнително е нагласен со развојот на односите меѓу Северна Кореја и Русија. Кина го толерира тоа партнерство, но внимателно го следи, бидејќи дополнително ги усложнува нејзините односи со провокативниот сосед“, изјави Карла Фриман, директорка на Институтот за надворешна политика при Школата за напредни меѓународни студии на Универзитетот „Џонс Хопкинс“.

Од крајот на 2024 година, Северна Кореја испратила муниција и до 16.000 војници за поддршка на војната на рускиот претседател Владимир Путин во Украина. Во изминатите три години, Ким и Путин одржале две средби на највисоко ниво. Во 2024 година, двајцата лидери потпишаа договор за заемна одбрана, според кој двете земји се обврзуваат да си помогнат во случај на напад.

— реклама —

За возврат за оружјето и војниците, Пјонгјанг добива девизи, борбено искуство за своите трупи, воена технологија и можност за проширување на политичката и економската соработка надвор од рамките на традиционалното партнерство со Кина.

Иако новиот мост би можел да ја зголеми трговијата, неговото значење за Пекинг се смета за повеќе геополитичко отколку економско. Кина тргува со Северна Кореја во многу помал обем отколку со други партнери, но останува убедливо нејзин најголем трговски партнер и главен донатор на помош.

Сепак, изолираниот режим во Пјонгјанг не сака дополнително да ја зголеми економската зависност од Кина. Отворањето на новите мостови затоа предизвикува загриженост дека би можело да ја засили борбата за влијание врз Северна Кореја меѓу Пекинг и Москва.