Кина до САД од ОН: „Веднаш укинете ги блокадата и санкциите кон Куба“

Кина во саботата на Генералното собрание на Обединетите нации упати критики кон политиките на САД, повикувајќи на почитување на суверенитетот и безбедноста на земјите од Блискиот Исток, вклучително и државите од Заливот.

Кинескиот потпретседател Хан Женг, кој не ги именуваше директно САД, порача дека големите сили имаат посебна одговорност за зачувување на меѓународниот мир и безбедност.

— реклама —

„Кина смета дека суверенитетот и безбедноста на земјите од Блискиот Исток, вклучително и Заливот, мора да се почитуваат“, изјави Хан.

— реклама —

Неговата порака дојде само неколку дена откако американскиот претседател Доналд Трамп во Белата куќа го пречека кинескиот претседател Си Џинпинг во атмосфера на пријателски односи меѓу двете земји.

Трамп за време на разговорите во Вашингтон го предупредил Си дека не го поддржува Иран. Тоа следуваше по извештаи дека Кина му доставила на Иран рачни противвоздушни ракетни системи и дека Техеран, со кинеска помош, пронашол начини за заобиколување на санкциите за продажба на нафта. Американскиот амбасадор во Кина во петокот изјавил дека Трамп добил уверувања оти Пекинг нема да постапи на таков начин.

— реклама —

Во својот говор Хан се осврна и на Куба, при што Кина побара од, како што рече, „релевантната земја“ веднаш да престане со заканите за употреба на сила против Куба и целосно да ги укине блокадата и санкциите.

Кубанската електроенергетска мрежа на почетокот на месецот доживеа целосен колапс, по што целата земја остана без електрична енергија. Системот со години се соочува со недостиг на гориво и застарена инфраструктура, додека американските мерки за ограничување на увозот на нафта дополнително ја влошиле состојбата.

Хан ја претстави Кина и како партнер на земјите во развој, нагласувајќи дека сите држави, без оглед на нивната големина, треба да имаат еднаков статус во меѓународната заедница и за светските прашања да се одлучува преку консултации.