Кина ги отфрли тврдењата дека обучувала руски војници за војната во Украина

Кина денеска категорично ги отфрли обвинувањата дека на нејзина територија биле обучувани руски војници за време на војната во Украина, оценувајќи дека таквите тврдења се целосно неосновани.

— реклама —

Реакцијата на Пекинг следува откако Германија побара објаснување по извештаите што, според Берлин, предизвикале сериозна загриженост во врска со наводната обука на руски војници во Кина.

Портпаролката на кинеското Министерство за надворешни работи, Мао Нинг, изјави дека кинескиот амбасадор во Германија, на барање на германската страна, неодамна одржал состанок со претставници на германското Министерство за надворешни работи, на кој биле разменети мислења за билатералните односи и други прашања од заеднички интерес.

— реклама —

Минатата недела германските власти го повикаа кинескиот амбасадор на итен разговор токму поради овие наводи.

— реклама —

„Таканаречените извештаи се неосновани и целосно измислени со цел да се оцрни Кина“, изјави Мао Нинг.

Таа повтори дека Кина и натаму има, како што рече, објективен и непристрасен став кон војната во Украина и останува посветена на политичко решавање на конфликтот преку мировни преговори.

„Германија треба објективно и рационално да гледа на ставот на Кина“, порача портпаролката на кинеското Министерство за надворешни работи.