Кина ѝ се закани на Америка со контрамерки поради санкциите за кинески компании поврзани со Куба

Кина остро реагираше на одлуката на САД да воведат санкции врз две кинески компании поради наводна испорака на електронска и безбедносна опрема за кубанската војска, предупредувајќи дека ваквите мерки го нарушуваат меѓународното право и ги загрозуваат економските и трговските односи меѓу двете земји.

— реклама —

Кинескиот вицепремиер Хе Лифенг, задолжен за економските и трговските односи со САД, преку видеоврска разговарал со американскиот министер за финансии Скот Бесент и трговскиот претставник Џејмисон Грир. Според кинеската агенција Синхуа, главни теми биле спроведувањето на договорите постигнати за време на средбите на претседателите на двете земји во Пекинг и Вашингтон, како и резултатите од билатералните трговски консултации.

Двете страни се согласиле да продолжат со економските и трговските консултации, да ја зајакнуваат соработката и да ги надминуваат несогласувањата со цел да се зачува стабилноста на односите. Сепак, кинеската страна изразила сериозна загриженост поради новите американски ограничувања за кинеските компании.

— реклама —

Кинеското Министерство за трговија ги осуди санкциите, оценувајќи дека Вашингтон воведува еднострани мерки врз компании поради нивните односи со трета земја, со што ги прекршува меѓународното право и основните норми на меѓународните односи.

— реклама —

Портпаролот на кинеското Министерство за надворешни работи, Гуо Ѓакун, изјавил дека Пекинг се противи на еднострани санкции што немаат основа во меѓународното право или не се одобрени од Советот за безбедност на Обединетите нации, како и на таканаречената екстратериторијална надлежност. Тој порача дека Кина нема да дозволи Вашингтон да ја попречува кинеско-кубанската соработка и дека ќе ги преземе сите неопходни мерки за заштита на интересите на своите компании.

Во меѓувреме, двете земји продолжуваат со спроведувањето на договорите од осмата рунда економски и трговски консултации, одржана од 20 до 23 септември во Њујорк и Вашингтон. Тогаш биле постигнати договори за намалување на царините, трговските и инвестициските механизми, како и продолжување на постојните трговски договори.

— реклама —

Според септемвриските договори, Кина и САД планираат до крајот на ноември да одржат нов дијалог за вештачката интелигенција, додека првата средба на работната група за земјоделство треба да се одржи до крајот на 2026 година. Договореното продолжување на механизмот за економски и трговски консултации од Куала Лумпур важи до 10 јануари 2027 година, а разговорите за изнаоѓање заеднички прифатливо решение треба да продолжат.