Кина и Перу ги продлабочуваат трговските врски со изменет договор за слободна трговија

Измените на договорот за слободна трговија меѓу Кина и Перу стапија во сила, овозможувајќи поедноставени царински постапки, подобра поврзаност на синџирите на снабдување и дополнителни олеснувања за трговијата и инвестициите.

— реклама —

Со новите правила ќе се олесни извозот на перуански земјоделски производи во Кина, особено боровинки, авокадо и грозје. Истовремено, кинеските компании ќе имаат полесен пристап до перуанскиот пазар за автомобили, машини и електронска опрема.

Измените опфаќаат правила за потеклото на стоките и царинските постапки, но и нови одредби за електронската трговија, пазарната конкуренција, синџирите на снабдување, стандардите и заштитата на животната средина.

— реклама —

Според претставници на трговскиот сектор, најголемата придобивка не е намалувањето на царините, туку побрзите и попредвидливи постапки. Тоа е особено важно за леснорасипливите производи, кај кои и неколкудневно доцнење може значително да ја намали пазарната вредност.

— реклама —

Новите олеснувања се очекува да ја зголемат и важноста на перуанското пристаниште Чанкај, отворено во ноември 2024 година во рамките на кинеската иницијатива „Појас и пат“. Директната поморска линија меѓу Чанкај и Шангај го скрати времето на транспорт од повеќе од еден месец на околу 23 дена, а трошоците се намалени за најмалку 20 отсто, објави кинеската новинска агенција Синхуа.

Договорот треба да поттикне и соработка во индустријата, преработката на суровини и инвестициите. Трговската размена меѓу Кина и Латинска Америка во 2025 година достигнала 3,93 билиони јуани, што претставува раст од 6,5 отсто во споредба со претходната година.

— реклама —

Кинеските експерти оценуваат дека изменетиот договор со Перу може да послужи како пример за продлабочување на економската соработка со други земји од Латинска Америка.