Кина ја коригира бројката: 82 жртви во најтешката рударска несреќа во последните 16 години

Кинеските власти ја ревидираа бројката на загинати во експлозијата на гас во рудник за јаглен во северната покраина Шанкси, при што наместо првично објавените 90, официјално се потврдени 82 жртви.

Според државните медиуми, хаотичната состојба на местото на несреќата довела до неточни информации во првите часови по трагедијата. И покрај корекцијата, ова останува најсмртоносната рударска несреќа во Кина во последните повеќе од 16 години.

— реклама —

Експлозијата се случила во петокот вечерта во рудник во округот Ќинјуан, кога под земја се наоѓале речиси 250 работници. Последните официјални информации велат дека 128 повредени рудари се во стабилна состојба.

Причината за несреќата сè уште не е официјално утврдена, но првичната истрага покажала дека операторот на рудникот сторил „сериозни прекршувања на законот“. Засега не се објавени детали за какви пропусти станува збор, но неколку лица веќе се приведени.

Спасувачката операција продолжила и во текот на саботата, речиси 20 часа по експлозијата.

— реклама —

Еден од преживеаните рудари, Ванг Јонг, за кинеската државна телевизија изјавил дека прво забележал густ чад и почувствувал мирис на сулфур.

„Им реков на луѓето да бегаат додека трчавме. Видов луѓе кои се гушеа од чадот и паѓаа на земја, а потоа и јас се онесвестив“, рекол тој.

— реклама —

Според неговото сведоштво, се разбудил по околу еден час, ги разбудил другите рудари околу него и заедно успеале да излезат од рудникот.

Кинескиот претседател Си Џинпинг нареди итна спасувачка операција и темелна истрага за причините за трагедијата.

„Секоја регија и секое ниво на власт мора да извлече поука од оваа несреќа и решително да спречи вакви катастрофи“, порача Си, пренесе државната агенција Синхуа.

Министерството за управување со вонредни состојби испратило 345 спасувачи од шест специјализирани тимови за да помогнат во операцијата.

Кина и претходно се соочувала со тешки рударски трагедии. Во 2023 година, во уривање на рудник во Внатрешна Монголија загинаа 53 лица, додека експлозија во рудник во покраината Хејлунгџијанг во 2009 година однесе повеќе од 100 животи.