Кинеската војска денеска изврши пробно лансирање на проектил од нуклеарна подморница кон Тихиот Океан, потег што предизвика загриженост и критики од Јапонија, Австралија и Нов Зеланд.
Според кинеската новинска агенција „Синхуа“, проектилот со лажна боева глава бил лансиран кон меѓународни води и паднал во однапред определена зона. Од Пекинг соопштија дека станува збор за рутинска воена вежба во рамките на годишната обука и дека тестирањето не било насочено против ниту една држава.
Австралиската министерка за надворешни работи Пени Вонг изјави дека Кина претходно ја известила австралиската влада за тестот, но оцени дека ваквите активности имаат дестабилизирачко влијание врз регионот.
И Јапонија потврди дека била известена за лансирањето, но истовремено упатила повик до Кина да го преиспита ваквиот потег. Од Токио изразија длабока загриженост поради засилените воени активности на Кина и наведоа дека биле предупредени за можност делови од проектилот да паднат во рамките на јапонската ексклузивна економска зона, иако подоцна беше потврдено дека тоа не се случило.
Загриженост изрази и Нов Зеланд. Министерот за надворешни работи Винстон Питерс изјави дека неговата земја била известена само неколку часа пред тестирањето и оцени дека јужниот Пацифик не треба да се користи како полигон за тестирање на ракетни способности.
