Кина денеска изрази длабока загриженост поради зголемените тензии на Блискиот Исток и ги повика сите страни да го почитуваат постојното примирје и да продолжат со дипломатските напори за надминување на кризата.
Портпаролот на кинеското Министерство за надворешни работи, Лин Џијан, на прес-конференција во Пекинг изјави дека нова ескалација на конфликтот не е во интерес на ниту една страна.
„Пекинг е длабоко загрижен поради актуелната ситуација. Нов конфликт не им служи на интересите на ниту една страна“, изјави Лин.
Тој нагласи дека Кина очекува сите засегнати страни да останат посветени на примирјето, да го одржат процесот на преговори, а несогласувањата да ги решаваат преку дипломатски и политички канали.
Изјавата на кинеската дипломатија доаѓа по новата размена на напади во регионот. Според информациите, Иран доцна синоќа истрелал повеќе ракети кон северниот дел на Израел, откако израелските воздухопловни сили извршиле напад врз јужните предградија на Бејрут.
Израелските власти соопштија дека цел на нападот бил команден и оперативен центар на Хезболах. Според првичните информации, во нападот загинале две лица, а уште 11 биле повредени.
Во меѓувреме, неколку држави издадоа предупредувања до своите граѓани. Амбасадата на Индија во Техеран ги повика индиските државјани да избегнуваат патувања во Иран и да размислат за напуштање на земјата доколку веќе се наоѓаат таму.
Сличен апел упати и кинеската амбасада во Израел, која ги советуваше кинеските државјани да бидат особено внимателни, да ги следат упатствата на локалните власти и веднаш да побараат засолниште во случај на воздушна опасност.
Последниот ракетен напад е прв поголем инцидент по кревкото примирје постигнато на почетокот на април со посредство на Пакистан. Иако прекинот на огнот беше договорен на 8 април, неговата примена се соочува со сериозни предизвици поради несогласувањата меѓу страните и новите безбедносни случувања во регионот.
Кина повторно нагласи дека стабилноста на Блискиот Исток е од клучно значење за регионалната и глобалната безбедност и повика на максимална воздржаност од сите инволвирани страни.
