Кинески лекари намалиле голем тумор кај неродено бебе со микробранова енергија

Кинески лекари примениле минимално инвазивна процедура со која значително го намалиле големиот тумор кај неродено бебе, без да ја отвораат матката. Наместо класична хируршка интервенција, лекарите користеле микробранова енергија за уништување на абнормалното ткиво додека фетусот сè уште бил во утробата.

Бебето имало конгенитална пулмонална малформација, позната како ЦПАМ. Кај повеќето случаи, состојбата не претставува сериозна опасност, но кај мал број фетуси малформацијата може брзо да расте и да изврши притисок врз срцето и белите дробови, што во најтешките случаи може да биде опасно по живот.

— реклама —

За ЦПАМ не постои единствен третман. Во зависност од состојбата, може да се применат стероидни лекови, а кај големи цисти исполнети со течност може да се постави дренажа преку стомакот и матката на мајката. Сепак, кај ваквите интервенции е забележан ризик од предвремено породување.

Друга можност е фетална лобектомија, при која матката хируршки се отвора за да се отстрани туморот од фетусот. Станува збор за голема операција, а според истражување на Универзитетот во Калифорнија, Сан Франциско, преживуваат околу половина од бебињата родени од мајки кои биле подложени на оваа процедура.

— реклама —

Во кинескиот случај, процедурата била изведена кај 40-годишна бремена жена во 22. гестациска недела. Малформацијата кај фетусот достигнала околу пет сантиметри и почнала да ги притиска срцето и белите дробови. Кај бебето било забележано и опасно наталожување течност во стомакот.

Лекарите, наместо отворена операција, употребиле мала игла која преку стомакот на мајката била насочена директно кон малформацијата. Преку иглата била испорачана микробранова енергија, со која абнормалното ткиво било загреано и уништено.

— реклама —

Ефектот бил забележлив само три дена по интервенцијата. Туморот значително се намалил, а течноста насобрана во стомакот на бебето целосно исчезнала.

Бебето било родено во 37. гестациска недела со царски рез и тежело околу 2,9 килограми.

— реклама —

Лекарите случајот го оценуваат како значаен бидејќи претставува прва забележана примена на микробранова аблација за лекување на фетална ЦПАМ.

Сепак, тие нагласуваат дека безбедноста и ефикасноста на методот не може да се потврдат врз основа на еден единствен случај. Доколку идните испитувања покажат дека процедурата е безбедна и ефикасна, таа би можела да стане дополнителна можност за третман на тешките случаи на ЦПАМ.