Хуманоидните роботи произведени во Кина сè повеќе доминираат на светскиот пазар, привлекувајќи внимание со своите напредни способности – од изведување акробации и регулирање сообраќај, до подготовка на пијалаци.
Според податоците што ги пренесува АП, минатата година во светот биле испорачани повеќе од 13.000 хуманоидни роботи. Кинеските компании AGIBOT и Unitree испорачале по повеќе од 5.000 роботи, со што заедно покриваат околу 85 проценти од глобалниот пазар.
Една од нивните најголеми предности е цената. Благодарение на користењето локални компоненти, кинеските модели се во просек најмалку 20 проценти поевтини од странските конкуренти, а некои поедноставни роботи во Кина можат да се купат и за помалку од 6.000 долари.
Компанијата Unitree минатата година остварила приходи од околу 250 милиони долари и нето-добивка поголема од 41 милион долари, додека значителен раст бележат и Matrix Robotics од Шангај и EngineAI од Шенжен.
Сепак, експертите предупредуваат дека голем дел од денешните хуманоидни роботи сè уште имаат повеќе демонстративна и забавна улога отколку вистинска практична примена. Тие посочуваат дека роботите и понатаму се соочуваат со предизвици при извршување сложени задачи во непредвидливи реални услови.
И покрај тоа, прогнозите остануваат оптимистички. Банката „Морган Стенли“ очекува продажбата на хуманоидни роботи во Кина годинава да надмине 28.000 единици, додека истражувачката куќа Omdia предвидува дека на почетокот на следната деценија глобалните годишни испораки би можеле да надминат еден милион роботи.
