Робот вознемирувал 16-годишна девојка во Келн, двајца млади го снимале инцидентот

Германската полиција истражува необичен случај во Келн, каде што робот висок околу 120 сантиметри наводно сексуално вознемирувал 16-годишна девојка, додека двајца млади го снимале настанот и го пренесувале во живо на социјалните мрежи.

— реклама —

Инцидентот се случил ноќта меѓу саботата и неделата, на 11 октомври, нешто пред полноќ, во центарот на Келн. Девојката била пред ресторан за брза храна, на аголот меѓу улиците Палмштрасе и Хоенцолернринг, заедно со две пријателки на возраст од 17 и 18 години.

— реклама —

Според полициските информации, црвено-златен робот ѝ се приближил одзади, ја допирал по задникот и изведувал движења што имитирале сексуален однос. Неговиот 16-годишен сопственик и 19-годишен пријател наводно го снимале настанот, го коментирале и го пренесувале во живо на социјалните мрежи.

По пријавата, полицајците брзо ги пронашле двајцата осомничени во близина на местото на настанот. Роботот повеќе не бил на улицата, бидејќи неговиот сопственик, од градот Вегберг, го ставил во багажникот на автомобил „Фолксваген“. Полицијата го пронашла и го запленила роботот, како и два мобилни телефони.

— реклама —

Истражителите сега утврдуваат како функционирал роботот за време на инцидентот и дали некој намерно ги контролирал неговите движења. Засега не е познато дали со него се управувало далечински или движењата биле однапред програмирани.

Германската полиција води истрага против двајцата осомничени поради сомнение за навреда од сексуална природа. Истрагата треба да утврди каква била нивната улога во инцидентот и на кој начин бил користен роботот.