Кинезите на чекор до ефикасна терапија за тешки оштетувања на мозокот: објавени резултати од клиничко испитување

Пациент во Кина, кој три месеци бил во кома по крвавење во мозокот, повторно ја стекнал способноста да зборува, самостојно да се храни и да оди со помош на друго лице по примена на експериментална терапија со фокусирани ултразвучни бранови.

— реклама —

Станува збор за дел од рано клиничко испитување на технологија што користи насочени ултразвучни импулси за стимулирање на длабоките структури на мозокот, со цел обновување на неговите функции кај пациенти со тешки невролошки оштетувања. Технологијата ја развила група истражувачи, меѓу кои и стручњаци од Институтот за напредни технологии во Шенжен, во рамките на Кинеската академија на науките.

Методата не бара хируршка интервенција ниту вградување електроди во мозокот. Со помош на магнетна резонанца се утврдуваат целните области, особено таламусот, кој има важна улога во регулирањето на свеста и поврзувањето на нервните мрежи. Потоа кон овие области се насочуваат фокусирани ултразвучни импулси.

— реклама —

Во прелиминарното истражување спроведено во соработка со Медицинскиот универзитет во Кунминг, подобрување на однесувањето што укажува на зачувување на свеста било забележано кај 13 од вкупно 24 пациенти со хронични нарушувања на свеста. Во текот на четири недели, пациентите примале по три терапии неделно, во траење од 20 минути.

— реклама —

Еден од најзабележителните случаи е пациентот кој по 30 дена ултразвучна терапија и рехабилитација повторно можел да разговара, самостојно да јаде и да оди со помош на друго лице.

Фокусираните ултразвучни бранови привлекуваат сè поголемо внимание кај научниците бидејќи овозможуваат пристап до длабоките структури на мозокот без отворање на черепот или хируршко вградување електроди.

Слични истражувања се спроведуваат и во Соединетите Американски Држави. Универзитетот на Калифорнија во Лос Анџелес предводи клиничко испитување во кое се вклучени 60 пациенти со тешки повреди на мозокот. Истражувањето опфаќа и контролна група што прима привидна стимулација, за да се утврди дали евентуалното закрепнување е резултат на терапијата или на спонтано подобрување на здравствената состојба.