„Ќе купам златен спреј и сам ќе ги допишам буквите на Ченто, или ќе ве фати срам пред 11 Октомври?“: Ицо Најдовски за оштетениот натпис на споменикот на македонскиот борец

Македонскиот активист во Австралија и уредник и водител на програмата на македонски јазик на Радио 3ZZZ во Мелбурн, Ицо Најдовски Перин, преку фејсбук објава реагираше за состојбата со споменикот на Методија Андонов-Ченто на скопскиот плоштад, во пресрет на 11 Октомври.

Перин посочува дека на споменикот недостигаат делови од буквите во презимето на Ченто, како и бројки од годините, што според него е показател за односот кон историското наследство.

— реклама —

„Ќе купам златен спреј и сам ќе ги допишам буквите на Ченто, или ќе ве фати срам пред 11 Октомври?“, прашува Перин во својата реакција.

Тој потсетува дека пред државниот празник 11 Октомври повторно ќе се говори за историјата, борбата и државноста, но оценува дека грижата за спомениците не го следи тој однос кон историското наследство.

— реклама —

Перин смета дека надлежните институции требало навреме да ги санираат оштетувањата на споменикот, особено пред одбележувањето на празникот.

„Ако надлежните немаат време, луѓе или пари за три букви, кажете – јас ќе купам еден златен спреј и уште вечерва сам ќе отидам да ги допишам! Само страв ми е дека за таква граѓанска акција експресно ќе ме затворат и казнат, додека за нивната негрижа и заборавање на сопствената историја никој никогаш не одговара“, наведува тој.

— реклама —

Тој додава дека е недостојно делегации да полагаат цвеќе пред споменици кои, како што вели, се оставени да пропаѓаат поради негрижа.

„Сè уште има време до недела – има ли барем малку совест и одговорност во овој град да се среди ова?“, прашува Перин.

— реклама —