Германскиот канцелар Фридрих Мерц би можел да ја напушти функцијата до католички Божиќ, односно до 25 декември, смета Сара Вагенкнехт, основачка на партијата БСВ.
„Претпоставувам дека Фридрих Мерц за Божиќ повеќе нема да биде канцелар“, изјавила Вагенкнехт во интервју за мрежата РНД.
БСВ засега е единствената партија што сигнализирала подготвеност за соработка со Алтернатива за Германија (АфД), со што на оваа партија ѝ се отвора можност да предводи покраинска влада.
Говорејќи за можната соработка, Вагенкнехт ја предупредила АфД да не се откаже од формирање влада и со тоа да отвори пат кон нови предвремени избори во покраината Саксонија-Анхалт.
„Нема да подлегнеме на уцени. Претпоставувам дека ако АфД сериозно смета на нови избори, многу нејзини гласачи ќе се запрашаат каков е односот на партијата кон нивните гласови“, изјавила таа.
Според Вагенкнехт, лидерот на АфД во Саксонија-Анхалт, Улрих Зигмунд, би морал да биде подготвен и без поддршка од БСВ да ја преземе функцијата покраински премиер и да формира малцинска влада.
Таа оценила дека нови избори би можеле повторно да ја исфрлат БСВ од покраинскиот парламент, но дека и АфД има причини да ги избегне.
Вагенкнехт додала дека е „сосема можно“ по нови избори повторно да биде формирано мнозинство од традиционалните партии.
Во АфД, пак, дел од членовите сметаат дека формирањето нова влада, дури и по изборите во Мекленбург-Западна Померанија и Берлин, би можело да потрае уште неколку недели.
Вагенкнехт, сепак, се надева на можност да предложи „натпартиски премиер“, што го застапува и за Мекленбург-Западна Померанија.
