МЕРЦ

Мерц: „Денес не би им препорачал на своите деца да студираат во САД“

Германскиот канцелар Фридрих Мерц денеска ги повика младите добро да размислат пред да одлучат да студираат или работат во Соединетите Американски Држави, оценувајќи дека Германија нуди подобри долгорочни перспективи.„Денес на своите деца не би им препорачал да одат во САД за таму да се школуваат и работат“, изјави Мерц на собир на германските католици во Вирцбург.Тој додаде дека во Америка се развила „поинаква општествена клима“.„Дури и најобразованите луѓе во САД денес имаат големи потешкотии да најдат работа“, рече германскиот канцелар.Мерц им порача на младите учесници на настанот дека германската социјална пазарна економија, и покрај економските последици од меѓународните конфликти и војни, и понатаму нуди силни можности, вклучително и работнички права за учество и одлучување на сите нивоа.„Сакам сите да нè охрабрам да останеме оптимисти и да веруваме дека можеме да успееме и покрај бројните предизвици“, изјави Мерц.Тој нагласи дека цврсто верува оти има малку држави во светот кои нудат толку големи можности за младите како Германија.

Свет | пред 3 часа

Мерц: Европа се разбуди, се зајакнува економски и во однос на безбедносната политика

Германскиот канцелар Фридрих Мерц денес изјави дека Европа „згрешила“ што верувала дека само нејзините вредности може да гарантираат мир и безбедност, тврдејќи дека Европската Унија мора да ја зајакне својата економска и воена моќ за да се соочи со растечките глобални предизвици, јавува Анадолу.„Европа се разбуди. Европа се зајакнува економски и во однос на безбедносната политика“, рече Мерц на церемонијата на доделување на Меѓународната награда „Карло Велики“ во Ахен.Мерц истакна дека блокот може да се наметне меѓународно само преку комбинирана економска и воена сила, притоа потврдувајќи ја поддршката на Европа за Украина против Русија.„Ние во Европа во минатото премногу се потпиравме на верувањето дека моќта на хуманистичките, европско-западни идеи магично ќе го трансформира светот во царство на слобода и мир. Погрешивме“, рече тој.Германскиот лидер порача дека Европа мора да излезе од она што тој го опиша како „лажен оптимизам“, продолжувајќи истовремено да го брани меѓународниот поредок заснован врз правила.„Европа има можност да учествува во обликувањето на новиот светски поредок, така што со него ќе владеат норми и правила, а не самоволие и закон на посилниот. Ја имаме таа можност“, изјави тој.Тој додаде дека Европската Унија склучува нови трговски партнерства низ светот за да ги намали стратегиските зависности и да ја зајакне својата глобална позиција.Мерц, исто така, го пофали поранешниот италијански премиер Марио Драги, кој ја прими наградата „Карло Велики“, за неговите предлози за реформирање на ЕУ во услови на интензивирање на глобалната конкуренција.Тој рече дека европските лидери ги прифатиле клучните препораки од извештајот на Драги за европската конкурентност и дека работат на спроведување реформи насочени кон зајакнување на економијата и единството на блокот.

Свет | пред 23 часа

(Видео) Мерц пречекан со свирежи на конгрес поради најавата за економски реформи

Германскиот канцелар Фридрих Мерц се соочи со непријателски прием на голем синдикален конгрес во Берлин, каде што делегатите повеќепати го прекинуваа и го пречекаа со свирежи додека ги бранеше економските реформи и мерките за штедење.Обраќајќи се пред синдикатите, Мерц изјави дека Германија повеќе не може да го одржи досегашното ниво на благосостојба без темелна модернизација на економијата и социјалниот систем.„Едноставно пропуштивме да ја модернизираме нашата земја“, рече тој.Тензијата во салата се зголеми кога канцеларот зборуваше за штедењето и најавените пензиски реформи.Мерц ја нарече пензиската реформа „најтешкиот предизвик“, додавајќи дека проблемот е поврзан со „демографијата и математиката“, што предизвика нов бран свирежи и негодување.Во меѓувреме, поддршката за неговата коалициска влада продолжува да опаѓа. Според најновата анкета DeutschlandTrend, само 13 проценти од Германците се задоволни од работата на владата.Истовремено, десничарската Alternative für Deutschland во неколку анкети ги престигна конзервативците на Мерц, користејќи го незадоволството поради економската стагнација, високите цени на енергијата и непопуларните реформи.И покрај критиките, Мерц ги повика синдикатите на соработка со владата во спроведувањето на реформите.

Свет | пред 3 дена

Мерц: ,,Не се согласуваме со Трамп, но можам да живеам со тоа"

Германскиот канцелар Фридрих Мерц изјави дека останува посветен на добрите трансатлантски односи, и покрај несогласувањата со американскиот претседател Доналд Трамп околу војната во Иран.Тој нагласи дека постојат разлики во ставовите, но дека тие не ја загрозуваат соработката меѓу двете земји. Мерц додаде дека ќе продолжи отворено да ги изнесува своите позиции и дека е подготвен за понатамошни разговори со Трамп, оценувајќи дека стабилното партнерство мора да биде способно да издржи и несогласувања.Изјавата доаѓа по критиките од Трамп упатени кон германскиот канцелар, во кои американскиот претседател оцени дека Мерц погрешно ги толкува случувањата поврзани со Иран и улогата на САД во преговорите за прекин на конфликтот.

Свет | пред 1 седмица

Мерц смирува тензии со САД по заканите на Трамп

Германскиот канцелар Фридрих Мерц се обиде да ги ублажи тензиите со Соединетите Американски Држави откако американскиот претседател Доналд Трамп повторно најави можност за намалување на военото присуство на САД во Германија. Иако директно не ги коментираше неговите изјави, пораките од обраќањето јасно укажаа на обид за смирување на односите.Несогласувањата меѓу Берлин и Вашингтон се продлабочија откако Мерц изјави дека Иран ги одолговлекува преговорите и со тоа ги понижува САД, во контекст на пошироките тензии на Блискиот Исток. Трамп возврати со остри критики и порача дека размислува за намалување на американските сили во Германија.Во настапот во Минстер, Мерц најголем дел од своето обраќање го посвети на значењето на НАТО и трансатлантското партнерство, нагласувајќи дека Германија останува цврсто посветена на соработката со САД и сојузниците. Тој истакна дека двете земји дејствуваат „рамо до рамо“ и дека постои блиска и доверлива комуникација, особено со Вашингтон.Канцеларот посочи и дека германската армија мора да биде подготвена за итна реакција, но и долгорочно да се зајакнува, со цел да одговори на новите безбедносни предизвици. Во однос на Иран, тој овојпат зазеде поостар став, повикувајќи го Техеран да се врати на преговарачката маса и да не ја држи регијата во неизвесност.Заканите за повлекување американски трупи од Европа не се нови, но повторно ја отворија дебатата за безбедноста на континентот. Германија има клучна улога како домаќин на значајни американски воени бази, вклучувајќи ја и воздухопловната база Рамштајн.И покрај острата реторика, експертите сметаат дека реално повлекување е малку веројатно, бидејќи САД имаат значителни стратешки интереси од присуството во Европа. Сепак, актуелните тензии и конфликтите на Блискиот Исток дополнително ја зголемуваат загриженоста за идната безбедносна архитектура, што ги поттикнува европските земји да вложуваат повеќе во сопствената одбрана.

Свет | пред 2 седмици

Зад затворени врати: Мерц му се спротивстави на Трамп за Иран

Германскиот канцелар Фридрих Мерц изјави дека на американскиот претседател Доналд Трамп му го пренел својот став дека војната во Иран е погрешна, но дека истовремено се труди да одржи конструктивни односи со него.Во интервју за германскиот магазин „Шпигел“, Мерц нагласи дека намерно избегнува јавни расправи со американскиот претседател, бидејќи смета дека таквите дискусии не носат резултати во дипломатски контекст. Тој додаде дека одлучил своите несогласувања да ги изнесува во приватни разговори, зад затворени врати.Мерц истакна дека Европа мора да ја зајакне својата безбедносна и одбранбена способност, нагласувајќи дека дипломатското влијание е ефикасно само доколку е поткрепено со воена сила. Во таа насока, тој повика на поблиска соработка со Франција и другите европски партнери за заедничка заштита на континентот.Во своите изјави, германскиот канцелар се осврна и на претходни дипломатски ситуации, посочувајќи дека јавните конфликти во Овалната соба на Белата куќа често не носат позитивни резултати, алудирајќи на други меѓународни лидери.Мерц ја истакна важноста на балансиран пристап во односите со САД, комбинирајќи отворен дијалог со дипломатска воздржаност.

Свет | пред 2 седмици

Трамп остро го нападна Мерц: „Не знаеш за што зборуваш“

Американскиот претседател Доналд Трамп остро го критикуваше германскиот канцелар Фридрих Мерц, тврдејќи дека тој „смета дека е во ред Иран да има нуклеарно оружје“.Трамп, исто така, порача дека доколку Техеран дојде до нуклеарна бомба, „целиот свет би бил заложник“, додавајќи дека во моментов презема чекори во врска со Иран кои, како што тврди, други држави и претседатели одамна требало да ги преземат.„Германскиот канцелар Фридрих Мерц смета дека е во ред Иран да има нуклеарно оружје. Тој не знае за што зборува! Кога Иран би имал нуклеарно оружје, целиот свет би бил заложник. Токму сега правам нешто во врска со Иран, нешто што други држави или претседатели одамна требало да го направат. Не е ни чудо што на Германија ѝ оди лошо, и економски и на други начини“, напиша Трамп на мрежата „Truth Social“.

Свет | пред 2 седмици

Трамп жестоко го нападна Мерц: „Не знае за што зборува“

Американскиот претседател Доналд Трамп остро го нападна германскиот канцелар Фридрих Мерц, откако Мерц оцени дека иранското раководство ги понижило Соединетите Американски Држави и дека Техеран ја надмудрува администрацијата на Трамп во преговорите.Трамп се огласи на платформата Трут Соушал, тврдејќи дека Мерц смета оти е прифатливо Иран да поседува нуклеарно оружје.„Германскиот канцелар Фридрих Мерц мисли дека е во ред Иран да има нуклеарно оружје. Тој не знае за што зборува“, напиша Трамп.Американскиот претседател додаде дека доколку Иран дојде до нуклеарно оружје, „целиот свет би бил заложник“.Трамп порача и дека во моментов презема чекори кон Иран што, според него, други држави и претседатели требало да ги направат одамна.Во истата објава тој ја нападна и Германија, поврзувајќи ги изјавите на Мерц со состојбата во земјата.„Не е ни чудо што на Германија ѝ оди толку лошо, и економски и на друг начин“, напиша Трамп.Претходно, Мерц во обраќање пред студенти во Марсберг изјави дека тимот на Трамп бил надмудрен во разговорите со Иран.„Очигледно е дека Иранците се многу вешти преговарачи, или уште подобро — многу се вешти во избегнување преговори“, рече германскиот канцелар.Тој додаде дека иранското раководство ја понижува цела нација, особено, како што наведе, Револуционерната гарда, и изрази надеж дека кризата што поскоро ќе заврши.Изјавата на Мерц дојде откако Трамп го откажа патувањето на американските преговарачи во Исламабад, каде што требаше да се одржат индиректни разговори со иранска делегација. Претходната рунда разговори во Пакистан заврши без напредок.

Свет | пред 2 седмици

Мерц го критикува САД: нема јасна стратегија за излез од конфликтот со Иран

Германскиот канцелар Фридрих Мерц ја критикуваше САД поради, како што оцени, недостиг на јасна стратегија за излез од конфликтот во Иран, предупредувајќи дека продолжената војна може да има сериозни последици за европските економии.Во обраќање пред ученици во градот Марсберг, Мерц посочи дека проблемот со ваквите конфликти е што не е доволно само да се започне воена интервенција, туку мора да постои и јасен план за завршување на војната. Тој се осврна и на претходни долготрајни војни, како оние во Авганистан и Ирак, нагласувајќи дека тие се пример за тешкотии при излегување од конфликт.Според него, САД влегле во сегашниот конфликт без доволно разработена стратегија, што ја отежнува можноста за брзо завршување на војната. Мерц додаде дека иранската страна се покажала како „искусен преговарач“, но и дека честопати одбегнува суштински преговори.Канцеларот предупреди и дека војната директно влијае врз економските резултати на Германија, при што владата веќе ја намалила прогнозата за економски раст поради глобалната нестабилност и енергетските последици од конфликтот.

Свет | пред 2 седмици

Мерц: ЕУ е подготвена постепено да ги ублажи санкциите кон Иран доколку се постигне сеопфатен договор

Лидерите на Европската Унија одржуваат самит на Кипар со претставници од Египет, Сирија и Либан, при што во фокусот се регионалните безбедносни и енергетски прашања.Германскиот канцелар Фридрих Мерц изјави пред своите колеги дека Европската Унија е подготвена постепено да ги ублажи санкциите кон Иран доколку се постигне сеопфатен договор. Како што пренесува Ројтерс, Мерц истакна дека тоа би претставувало придонес на ЕУ кон напредокот на преговорите и, како што рече, кон постигнување трајно примирје.Претседателот на Европскиот совет Антонио Кошта, според АФП, изјавил дека Ормускиот теснец мора „веднаш повторно да се отвори без ограничувања и без наплата“, нагласувајќи дека тоа е од „витално значење за целиот свет“.Во пресрет на состанокот, високата претставничка на ЕУ за надворешна политика Каја Калас предупреди дека светот би можел да се соочи со поопасен Иран доколку преговорите не резултираат со договор со сила како нуклеарниот спогодба од 2015 година, од кој Соединетите Американски Држави се повлекоа за време на првиот мандат на Доналд Трамп.

Свет | пред 3 седмици

Мерц: Војната со Иран би можела да ја погоди Европа повеќе отколку пандемијата на ковид

Фридрих Мерц, германскиот канцелар, повика на брз прекин на американско-израелската воена кампања против Иран, предупредувајќи дека ескалацијата во поширок регионален конфликт сериозно би ја оптоварила европската економија, јавува Anadolija.„Ако овој конфликт ескалира во голем регионален судир, тоа може да ја оптовари Германија и Европа дури и повеќе отколку што доживеавме за време на пандемијата на ковид-19 или на почетокот на војната во Украина во февруари 2022 година“, изјави Мерц на заедничка прес-конференција во Берлин со сирискиот претседател Ахмед ел Шар.Мерц истакна дека за време на разговорите со сирискиот претседател биле разгледани најновите случувања на Блискиот Исток и опасностите од продолжен или поширок конфликт.

Свет | пред 1 месец

Германија и Сирија се договорија: 80 проценти од бегалците ќе бидат вратени

Германскиот канцелар Фридрих Мерц изјави дека 80 отсто од повеќе од 900.000 сириски државјани во Германија треба да се вратат во својата татковина во наредните три години.На конференција за медиуми со привремениот сириски претседател Ахмед ал-Шара во Берлин, Мерц рече дека се договориле дека во долг рок, во наредните три години, 80 отсто од Сиријците треба да се вратат во својата татковина.„Тоа беше и желба на претседателот на Сирија. Тие Сириjци кои сакаат да останат во Германија и кои се добро интегрирани, ќе можат да останат во Германија“, изјави Мерц.Германија беше едно од главните прибежишта за сириските бегалци кои бегаа од граѓанската војна.Повеќе од 900.000 од нив пристигнаа во Германија за време на владеењето на соборениот сириски претседател Башар ал-Асад.

Свет | пред 1 месец

Мерц: Германија подготвена за мисија во Ормутскиот теснец, но по завршување на војната

Германскиот канцелар Фридрих Мерц изјави дека Германија е подготвена да се вклучи во меѓународна мисија за обезбедување на Ормутскиот теснец, но само по завршување на конфликтот меѓу САД, Израел и Иран.„Сакам да испратам јасен сигнал дека сме подготвени да помогнеме. Но за тоа да се случи, борбите мора да престанат“, рече Мерц во пресрет на самитот на Европската Унија во Брисел.Тој нагласи дека евентуалното учество на Германија би било можно само со меѓународен правен мандат.Мерц ја поздрави и, како што рече, подготвеноста на американскиот претседател Доналд Трамп за деескалација на конфликтот.„Особено сум благодарен што беше испратен сигнал дека постои волја за прекин на борбите“, изјави тој, додавајќи дека таков исход би зависел и од потезите на Иран – вклучително и откажување од нуклеарната програма и прекин на нападите во регионот.Според него, доколку во наредните денови се постигне напредок, тоа би значело дека ситуацијата се движи во позитивна насока, но предупреди дека предизвиците ќе останат долгорочни.Германија, додаде Мерц, останува во постојан контакт со партнерите од регионот и земјите од Персискиот Залив во врска со развојот на ситуацијата.

Свет | пред 1 месец

Мерц: НАТО служи за одбрана, не за напади

Германскиот канцелар, Фридрих Мерц, денес потврди дека Германија нема да се вклучи во војната на САД и Израел против Иран. Како клучни причини го наведе отсуството на потребен мандат и фактот дека сојузниците не ја консултирале Германија пред почетокот на конфликтот.На прес-конференција во Берлин, Мерц појасни дека одлуката е заснована на германскиот устав. „Според нашиот Темелен закон, потребен е мандат од Обединетите нации, Европската унија или НАТО, а ние го немаме. Затоа од самиот почеток беше јасно дека ова не е задача за НАТО. НАТО служи за одбрана, не за напади“, рече тој.Мерц нагласи дека Германија не била вклучена во одлуките што претходеле на конфликтот. „САД и Израел не не консултираа пред оваа војна. Никогаш не беше донесена заедничка одлука дали воопшто треба да се дејствува против Иран. Затоа прашањето за германски воен ангажман воопшто не се поставува“, заклучи канцеларот.

Свет | пред 1 месец

Мерц: Трамп ме увери дека американската војска ќе остане во Германија

Американскиот претседател Доналд Трамп потврди дека САД имаат намера да ја задржат својата воена присутност во Германија, изјави германскиот канцелар Фридрих Мерц.Трамп ме увери уште еднаш дека САД имаат намера да ја задржат својата воена присутност во Германија“, рече Мерц во Вашингтон по средбата со Трамп во Белата куќа, додавајќи дека тоа се добри вести и дека ништо друго не очекувал.Со оглед на критичкиот став на Трамп кон Европа, во последните месеци се шпекулираше дека би можел да ги повлече американските трупи од Германија. Мерц не појасни дали Трамп ветил дека американскиот воен контингент ќе остане на сегашното ниво.Германскиот канцелар истакна дека со американскиот колега на разговорот пред самитот на НАТО во Анкара во јули дискутирале како подобро да се организира заедничкото воено одвраќање во иднина, без да открива детали.Трамп призна дека германската влада исто така презела одредена водечка улога во зајакнувањето на европската компонента на НАТО“, нагласи Мерц, заклучувајќи дека САД ја почитуваат Германија и нејзиното големо вложување во конвенционалната армија.

Свет | пред 2 месеци

Мерц пристигнува кај Трамп: Прва посета од почетокот на војната со Иран

Американскиот претседател Доналд Трамп денеска во Белата куќа ќе го пречека германскиот канцелар Фридрих Мерц, при што се очекуваат разговори за чувствителни теми – од американско-израелските напади врз Иран до најавените нови царини на Вашингтон и неодамнешната посета на германскиот лидер на Кина.Мерц отпатува од Берлин за Вашингтон во момент кога Германија и Франција најавија продлабочување на соработката во областа на нуклеарното одвраќање, како дел од прилагодувањето на европските сојузници кон промените во трансатлантските односи, во услови на постојани закани од Русија и нестабилност поврзана со конфликтот со Иран.Германскиот канцелар неодамна се сретна и со кинескиот претседател Си Џинпинг, а во Вашингтон ќе настојува да го зачува позитивниот однос изграден со Трамп во текот на изминатата година, паралелно со зголемените германски издвојувања за одбрана.Мерц ќе биде првиот европски лидер што ќе го посети Вашингтон по нападите врз Иран, кои доведоа до блокада на една од клучните светски рути за транспорт на нафта и предизвикаа нарушувања во глобалниот воздушен сообраќај.За време на викендот, во американско-израелските напади, според извештаите, беше убиен иранскиот врховен лидер ајатолах Али Хамнеи, како и други високи ирански претставници.Во неделата, Мерц не ги критикуваше американските воздушни напади, но ниту експлицитно ги поддржа. „Ја разбираме таа дилема“, изјави тој, посочувајќи дека повеќедецениските обиди не го одвратиле Иран од стремежот кон нуклеарно оружје ниту од репресијата врз сопствениот народ.Затоа нема да им држиме предавања на нашите партнери за нивните воени напади врз Иран“, порача германскиот канцелар.

Свет | пред 2 месеци

Мерц: Членство на Украина во ЕУ до 2027 не е возможно

Германскиот канцелар Фридрих Мерц изјави дека влезот на Украина во Европската унија до почетокот на следната година не е реална цел, истакнувајќи дека станува збор за долг процес.Мерц со ова ги намали очекувањата поставени од украинскиот претседател Володимир Зеленски, кој како целна година за членство ја наведе 2027.„Пристапувањето на 1 јануари 2027 година не е возможно. Тоа не е реалистично“, рече Мерц во Берлин, пренесува агенцијата DPA.Германскиот канцелар нагласи дека секоја држава кандидат прво мора да ги исполни Копенхашките критериуми, кои опфаќаат низа политички, економски и законодавни услови, а овој процес обично трае години. „Украина можеме постепено да ја приближуваме кон Европската унија“, додаде тој.Украина го доби статусот на кандидат за членство во ЕУ во 2022 година, а минатата година заврши процес на анализа на усогласеноста на своето законодавство. Киев се залага за забрзано пристапување поради тековните мировни преговори со Москва, тврдејќи дека членството е клучно за поствоеното закрепнување и безбедноста на земјата.Иако Брисел го оцени напредокот на Киев во реформите, отворањето на пристапните поглавја сè уште го блокира унгарскиот премиер Виктор Орбан.Орбан претходно изјави дека доверлив документ, дискутиран во рамките на ЕУ во текот на мировните преговори, предвидува влез на Украина во Унијата следната година преку забрзана процедура.

Свет | пред 3 месеци

Мерц: Подготвени сме за Трамповиот одбор за мир поради Газа, но не во сегашна форма

Германскиот канцелар Фридрих Мерц денеска изјави дека би бил подготвен да се приклучи на одборот за мир на американскиот претседател Доналд Трамп поради ситуацијата во Газа, но дека не може да го прифати планот во неговата сегашна форма.„Во форма во која е поставен сегашниот одбор за мир, не можеме од уставни причини да ги прифатиме неговите управувачки структури“, рече Мерц на заедничка прес-конференција со италијанската премиерка Џорџија Мелони во Рим.Тој додаде дека Германија е отворена за истражување други, нови форми на соработка со САД, со цел да се најдат формати кои ќе придонесат за мир во различни региони на светот. Мерц истакна дека овие формати не треба да се ограничуваат само на Газa и Блискиот исток, туку можат да се применат и на Украина.

Свет | пред 3 месеци

Медведев предлага киднапирање на Мерц

Два дена по апсењето на венецуелскиот претседател Николас Мадуро и неговото префрлање во Њујорк, поранешниот руски претседател и потпретседател на Советот за безбедност, Дмитриј Медведев, наводно изнел контроверзен предлог за киднапирање на германскиот канцелар Фридрих Мерц, кого го нарекол „неонацист“, пренесува ТАСС.„Киднапирањето на неонацистот Мерц би можело да биде одличен пресврт во овој карневал на настани“, изјавил Медведев, додавајќи дека во Германија дури постојат основи за кривично гонење, па тоа „не би било загуба“, особено со оглед на тешкотиите кои ги трпат граѓаните.Според извештаите, Медведев упатил слична закана и кон украинскиот претседател Володимир Зеленски, кого го оцени како „нелегитимен лидер“ поради наводно недржани избори.Овие изјави предизвикаа нов бран на реакции во меѓународната заедница, додавајќи нова тензија во односите меѓу Русија, Германија и Украина.

Свет | пред 4 месеци

Мерц го нарече Путин „најтешкиот воен злосторник“, Кремљ вели неговите ставови се „неважни“

Кремљ денеска порача дека ставовите на германскиот канцелар Фридрих Мерц за мировни преговори околу Украина треба да се игнорираат, откако тој изјави дека Владимир Путин е „можеби најтешкиот воен злосторник на нашето време“.„Речиси е невозможно да се земат предвид ставовите на Мерц по неговите последни изјави,“ изјави портпаролот Дмитриј Песков за време на посетата на Кина, реагирајќи на предлогот мировните преговори да се одржат во Женева.Мерц вчера во интервју нагласи дека за луѓе како Путин „нема место за попустливост“. Тој и претходно ја обвинуваше Русија за „сериозни воени злосторства“ и за „терор врз цивилното население“, но ова е првпат директно да го означи рускиот претседател како потенцијално најтежок воен злосторник на денешницата.Изјавите на германскиот канцелар доаѓаат во момент кога меѓународните правни постапки против Путин се уште се во тек. Потсетуваме, во март 2023 година, Меѓународниот кривичен суд издаде налог за апсење на Путин под сомнение за незаконска депортација на украински деца.Налот за апсење значително ги усложни дипломатските напори. Австриското министерство за надворешни работи неодамна соопшти дека земјата е подготвена да биде домаќин на мировни преговори меѓу Украина и Русија, но нагласи дека би се консултирала со Меѓународниот кривичен суд за да се избегне ситуација во која Путин би морал да биде уапсен за време на евентуална посета.

Свет | пред 8 месеци