Преговори за Украина во Абу Даби на 10 и 11 ноември, Мерц бара учество на Европа

Германскиот канцелар Фридрих Мерц денеска изјави дека Русија мора да покаже дека е сериозна во намерата да постигне прекин на огнот и мировен договор на преговорите што следната недела ќе се одржат во Абу Даби.

Мерц во Берлин го пречека украинскиот претседател Володимир Зеленски и оцени дека новата рунда преговори меѓу претставниците на Украина, Соединетите Американски Држави и Русија е „вистински чекор“ кон завршување на конфликтот. Сепак, тој истакна дека од клучно значење е Европа да биде вклучена во тој процес, пренесува Ројтерс.

— реклама —

„Важно е Русија конечно сериозно да пристапи кон преговорите за прекин на огнот, а потоа и за мировен договор. Досега не видов никаков знак дека тоа е случај“, им рече Мерц на новинарите.

Средбата во Абу Даби ќе се одржи на 10 и 11 ноември и ќе претставува прва директна средба меѓу Украина и Русија од февруари. Според зборовите на Зеленски, разговорите треба да ги опфатат безбедносните гаранции, прекинот на огнот во енергетскиот сектор и примирјето во Црното Море, кое би овозможило продолжување на извозот на храна.

— реклама —

Мерц нагласи дека секој траен договор мора да ги вклучи и европските земји, кои досега главно беа изоставени од преговорите што ги водат пратениците на американскиот претседател Доналд Трамп, Стив Виткоф и Џаред Кушнер.

Говорејќи за самитот на Групата 20, кој во декември ќе се одржи во Мајами, Мерц рече дека Зеленски треба да присуствува на тој собир доколку Трамп го покани рускиот претседател Владимир Путин.

„Целосно е неприфатливо трети земји да разговараат за иднината на Украина, а во тоа да не учествува самата Украина“, рече Мерц, додавајќи дека преговорите навистина мора да доведат до завршување на непријателствата.

— реклама —

Германскиот канцелар истакна дека Германија, која во моментов ѝ пружа најголема поддршка на Украина, ќе продолжи воено да му помага на Киев.

„Тоа го правиме во сопствен интерес, во интерес на Европа и во интерес на стабилниот политички поредок во Европа“, порача Мерц.

— реклама —

Зеленски за време на посетата на Берлин ќе се сретне и со претседателот на Германија, Франк-Валтер Штајнмаер, и со претседателката на Бундестагот, Јулија Клекнер.

Украинскиот претседател ќе учествува и на Берлинската безбедносна конференција, на која се собираат претставници на одбранбената индустрија, воени експерти и научници. На повеќе панели ќе зборуваат над 140 учесници за воените закани и безбедносната состојба.