По изборните резултати во Берлин и Мекленбург-Западна Померанија, германскиот канцелар Фридрих Мерц се обрати до јавноста, во момент кога неговата Христијанско-демократска унија (ЦДУ) се соочува со зголемен политички притисок по серијата изборни резултати во покраините.
Мерц резултатот во Берлин го оцени како солиден, но за исходот во Мекленбург-Западна Померанија рече дека не може да се разубавува.
„Резултатот во Мекленбург-Западна Померанија не можеме да го разубавуваме, тоа е катастрофа“, изјави Мерц.
Канцеларот потсети дека ЦДУ во текот на годината имала различни изборни резултати. Тој ги спомена изборите во Саксонија-Анхалт, каде што партијата претрпе тежок пораз, но и резултатите од локалните избори во Хесен и Долна Саксонија, каде што, според него, ЦДУ повторно била најсилна политичка сила.
Осврнувајќи се на изборите во Мекленбург-Западна Померанија, Мерц рече дека ЦДУ се борела, но на крајот била „самелена во заострената трка меѓу СПД и АфД“.
За Берлин, пак, тој истакна дека кандидатот на ЦДУ, Стефан Еверс, влегол во изборната кампања во исклучително тешки услови и успеал да обезбеди солиден резултат.
Говорејќи за состојбата во Германија, Мерц рече дека граѓаните се загрижени за иднината на земјата. Според него, државата станала премногу сложена, економијата минува низ длабока преобразба, а политичкиот и општествениот дијалог станува сè поостар.
Тој предупреди и на намалувањето на довербата во институциите, додавајќи дека радикалните политички сили од левицата и десницата активно придонесуваат кон тој процес.
Мерц порача дека Германија и Европа мора повторно да разговараат за слободата, безбедноста, мирот, но и за сопствените силни и слаби страни.
„Одговорот не може да биде враќање во добрите стари времиња. Но, одговорот не може да биде ниту сè што е добро постојано да го прикажуваме како лошо. Одговорот мора да биде да ја подготвиме нашата земја за иднината“, рече германскиот канцелар.
Тој најави дека реформите мора да продолжат и покрај тоа што дел од нив за граѓаните ќе значат дополнителни оптоварувања и неизвесност.
„Токму затоа овие одлуки сега не можеме да ги одложуваме. Реформите мора да дојдат. Јас ја преземам оваа одговорност затоа што сакам да ја придвижам нашата земја напред“, порача Мерц.
Канцеларот реформите ги поврза и со спротивставувањето на авторитарните политички тенденции во германското општество.
„Ќе одам дотаму што ќе кажам: овие реформи се средство против авторитарниот отров, против фасцинацијата од авторитарноста која сè подлабоко навлегува во нашето општество“, рече Мерц.
Тој на крајот порача дека периодот што следува ќе бара цврст став, истрајност и трпение, додавајќи дека како претседател на ЦДУ и германски канцелар ќе ја преземе одговорноста за спроведување на промените.
Изборите во Берлин и Мекленбург-Западна Померанија се одржаа само две недели по гласањето во Саксонија-Анхалт, каде што ЦДУ освои околу 17 отсто, додека АфД освои речиси 44 отсто од гласовите.
