Мерц пристигна во Киев со шефови на германски одбранбени компании: Носи пакет од 1,35 милијарди евра

Германскиот канцелар Фридрих Мерц пристигна во Киев во придружба на раководители на големи германски одбранбени и енергетски компании, во момент кога Русија ги засилува нападите врз украинските градови и енергетската инфраструктура.

Мерц за време на посетата треба да објави нов пакет германска помош за Украина, кој вклучува една милијарда евра воена поддршка и дополнителни 350 милиони евра за санација на украинскиот енергетски сектор.

„Денеска отпатував во Киев бидејќи на Украина ѝ е потребна сета наша поддршка во претстојните недели“, изјави Мерц, посочувајќи на руските напади врз градовите, станбените објекти и системите за греење.

Германскиот канцелар предупреди дека последиците од војната не се ограничени само на Украина.

— реклама —

„Ако Русија не биде запрена, нејзината воена машинерија порано или подоцна ќе се сврти против нас“, рече Мерц.

Тој најави дека на украинскиот претседател Володимир Зеленски ќе му ја повтори пораката дека Киев и понатаму може да смета на германската помош.

„Денеска ќе му кажам на претседателот Зеленски: Можете и понатаму да сметате на нашата помош“, порача Мерц.

— реклама —

Заедно со канцеларот во Киев пристигна и германската министерка за економија Катерина Рајхе, како и делегација во која се раководители на компании меѓу кои „Siemens Energy“, „Hensoldt“, „Diehl Defence“ и „Quantum Systems“.

Една од главните теми на посетата е продлабочувањето на соработката меѓу германската и украинската одбранбена индустрија. Се очекува да биде финализиран договор за заедничко производство на повеќе видови беспилотни летала.

Посебен акцент е ставен на забрзаното производство на дронови-пресретнувачи наменети за соборување на брзите руски беспилотни летала на млазен погон.

Германската компанија „Quantum Systems“ и украинскиот производител „WIY Drones“ претходно најавија заедничка компанија „Quantum WIY Industries“, преку која треба да се произведува дронот-пресретнувач „Strila“, како и други технологии за противвоздушна одбрана.

— реклама —

Соработката предвидува и заеднички развој и производство на оружје со дострел поголем од 1.000 километри, со што Украина би добила дополнителни можности за напади врз цели длабоко на руска територија.

Зеленски претходно, по телефонски разговор со Мерц, најави дека Украина и Германија се блиску до финализирање договори за производство на беспилотни летала, проектили и софтвер за нивно управување.

Покрај воената помош, Берлин издвојува уште 350 милиони евра за поправка и обновување на украинската енергетска инфраструктура, која повторно е цел на интензивни руски напади.

— реклама —

За време на посетата се очекува да бидат отворени и прашањата за реформите што од Украина ги бараат нејзините европски партнери, вклучително и борбата против корупцијата и зајакнувањето на институциите.

Мерц претходно предупреди и на зголемениот број хибридни напади за кои Берлин ја обвинува Русија, нагласувајќи дека Германија нема да дозволи да биде заплашена.

Москва, пак, најави дека ќе продолжи со нападите врз цели во Украина, кои руското Министерство за надворешни работи ги опишува како одговор на украинските напади врз руска територија во изминатите месеци. Русија истовремено ги предупреди странските државјани и дипломатскиот персонал да избегнуваат престој и патувања во Украина.

Посетата на Мерц доаѓа и во момент кога Зеленски најавува засилување на украинските напади врз руските нафтени рафинерии, како одговор на, како што тврди, новата руска стратегија за интензивирање на нападите врз украинската цивилна и енергетска инфраструктура.