Мерц: Црна Гора би можела да стане 28. членка на ЕУ во 2028 година

Германскиот канцелар Фридрих Мерц оцени дека Црна Гора има реални шанси да стане 28. членка на Европската Унија во 2028 година. Тој смета дека отворените прашања меѓу Црна Гора и Хрватска можат да се решат и нема да бидат пречка за нејзиното пристапување во Унијата.

Мерц го изјави ова на прес-конференција по самитот на Берлинскиот процес во Милочер, во близина на Будва. Тој порача дека Црна Гора има јасна европска перспектива и дека целта на нејзините власти за членство до 2028 година е остварлива.

— реклама —

Германскиот канцелар посочи дека разговарал со хрватскиот премиер Андреј Пленковиќ за отворените прашања меѓу двете земји и изрази уверување дека преостанатите спорови нема да го попречат влезот на Црна Гора во ЕУ.

Црногорскиот премиер Милојко Спајиќ, исто така, ја нагласи важноста на дијалогот со Хрватска. Тој информираше дека Црна Гора ги доставила сите преговарачки позиции за поглавјата 23 и 24, кои се однесуваат на правосудството, основните права и безбедноста, и изрази надеж дека тие ќе бидат затворени во декември.

— реклама —

Хрватска има осум отворени прашања со Црна Гора. Меѓу нив се сопственоста над училишниот брод „Јадран“, границата на Превлака, обесштетувањето на поранешните затвореници во логорот Морињ, пронаоѓањето на исчезнатите од војната во Хрватска и имотните права на хрватските семејства во Црна Гора. Пленковиќ претходно ги поздрави одлуките на црногорската влада за промена на името на базенот во Котор и за дополнително одобрување на спомен-плочата во поранешниот логор Морињ, оценувајќи ги како чекор во добра насока.

— реклама —

Мерц се осврна и на другите земји од Западен Балкан, нагласувајќи дека треба постепено да се приближуваат кон ЕУ. Сепак, предупреди дека политичките тензии и нерешените спорови во регионот го забавуваат тој процес.

Австрискиот канцелар Кристијан Штокер, говорејќи за Србија, оцени дека отфрлањето на австрискиот предлог не е добар сигнал за Европската Унија. Тој се заложи за слободни и независни избори во Србија и нагласи дека младите треба да имаат значајна улога во одлучувањето за иднината на регионот.

Црна Гора го заврши годинешното претседавање со Берлинскиот процес со самитот во Милочер, на кој учествуваа претставници на шесте земји од Западен Балкан и нивните европски партнери. Процесот беше покренат од Германија во 2014 година со цел да ја поттикне регионалната соработка и да го поддржи приближувањето на земјите кон ЕУ.

Црна Гора досега привремено затворила 21 од вкупно 33 преговарачки поглавја, откако на 12 октомври затворила уште три. Нејзините власти планираат да ги завршат преговорите до крајот на 2026 година, со цел земјата да стане членка на Унијата во 2028 година. За приемот е потребна согласност од сите земји членки, вклучително и Хрватска.