По изборниот пораз на Христијанско-демократската унија (ЦДУ) во Мекленбург-Западна Померанија и Берлин, во германската партија се одржал состанок зад затворени врати, на кој не присуствувал канцеларот и лидер на ЦДУ, Фридрих Мерц.
Седум од осумте покраински премиери од редовите на ЦДУ, заедно со неколку покраински партиски лидери, по претходната средба со Мерц во партиската централа продолжиле со разговори без него. Според информациите на ДПА, состанокот траел околу два часа и се одржал во претставништвото на покраината Рајнска област-Пфалц во Берлин.
Меѓу учесниците биле покраинскиот премиер на Рајнска област-Пфалц Гордон Шнидер, лидерот на ЦДУ во Баден-Виртемберг Мануел Хагел, премиерот на Хесен Борис Рајн, премиерот на Шлезвиг-Холштајн Даниел Гинтер, премиерот на Саксонија Михаел Кречмер и лидерот на ЦДУ во Долна Саксонија Себастијан Лехнер.
Фактот што политичарите прво разговарале со Мерц во седиштето на партијата, а потоа уште два часа продолжиле без него, го привлече вниманието на германските медиуми. Никој од учесниците не сакал да даде изјава по завршувањето на состанокот.
Според дописникот на СВР Ено Осбург, ваквата средба без канцеларот во вечерта по изборниот пораз отвора простор за различни толкувања. Тој оцени дека покраинските лидери очигледно имале потреба меѓусебно да разговараат без присуство на Мерц.
Само неколку дена пред изборите, сите осум покраински премиери од ЦДУ јавно застанаа зад Мерц и ги отфрлија шпекулациите за неговата политичка иднина. Во заедничката изјава тие порачаа дека сакаат заедно со канцеларот да придонесат за решавање на проблемите во Германија. Сепак, името на Мерц не било споменато ниту еднаш во самата изјава.
По изборите, состојбата во партијата стана посложена. ЦДУ во Мекленбург-Западна Померанија освои 4,9 отсто од гласовите и за првпат во повоената историја не обезбеди место во покраинскиот парламент. Во Берлин, исто така, партијата претрпе изборен пораз, додека Левицата освои најмногу гласови.
И покрај резултатите и внатрепартиските реакции, Мерц порача дека нема намера да поднесе оставка. Тој најави продолжување на реформите и на политичкиот курс на Владата.
Раководството на ЦДУ повторно ќе ги разгледува изборните резултати. По состанокот на претседателството следува седница на сојузниот извршен одбор, додека за вторник е закажана седница на пратеничката група на ЦДУ/ЦСУ во Бундестагот.
Состанокот без Мерц не претставува формална одлука за промена на раководството на партијата, но доаѓа во момент кога ЦДУ ги анализира последиците од изборните резултати и идниот политички курс.
