Германија и Јужна Кореја го продлабочуваат стратешкото партнерство, фокусот на одбраната и вештачката интелигенција

Германија и Јужна Кореја договорија продлабочување на соработката во одбранбената индустрија, вештачката интелигенција и другите напредни технологии. Договорот беше постигнат на средбата во Сеул меѓу германскиот канцелар Фридрих Мерц и јужнокорејскиот претседател Ли Џе-мјунг.

— реклама —

„Потребна ни е, повеќе од кога било, силна мрежа на партнери кои споделуваат важни интереси и заеднички вредности“, изјави Мерц, најавувајќи дека односите меѓу двете земји ќе бидат подигнати на ниво на продлабочено стратешко партнерство.

Двете држави планираат да ја прошират соработката во воената индустрија и развојот на вештачката интелигенција. Јужнокорејскиот претседател најави и можност за склучување договор за заштита на доверливи воени податоци, што би овозможил побезбедна размена на чувствителни информации.

— реклама —

Мерц предупреди и на безбедносните последици од воената соработка меѓу Русија и Северна Кореја. Тој посочи дека севернокорејски војници се борат на руска страна против Украина во Донбас, додека Москва му испорачува оружје на Пјонгјанг.

— реклама —

„Северна Кореја ја загрозува безбедноста на цела Европа со тоа што ги става своите војници на располагање на Русија. Безбедноста на Кореја е поврзана со безбедноста на Европа, а безбедноста на Европа е поврзана и со безбедноста на Кореја“, рече германскиот канцелар.

Тој му се заблагодари на јужнокорејскиот претседател за подготвеноста на неговата земја да продолжи да ја поддржува Украина.

Посетата на Јужна Кореја е последна станица од азиската турнеја на Мерц, по претходните посети на Сингапур и Јапонија. За петок е предвидена и негова посета на демилитаризираната зона што ги разделува Северна и Јужна Кореја.