Северна Кореја првпат по 78 години го менува изгледот на државното знаме

Северна Кореја за првпат по 78 години ги менува пропорциите на своето државно знаме, со одлука на лидерот Ким Џонг Ун. Со ова се напушта обликот што се користел од основањето на државата во 1948 година, во периодот кога Советскиот Сојуз имал силно влијание врз нејзиното создавање.

Промената е потврдена во изменетиот Устав на Северна Кореја, објавен на официјалната државна интернет-страница „Наенара“. Според новиот член 166, односот меѓу висината и ширината на знамето ќе изнесува 1:1,65, наместо досегашните 1:2. Тоа значи дека знамето ќе биде пократко и помалку издолжено.

— реклама —

Препознатливите црвена, бела и сина боја остануваат непроменети, како и црвената петокрака ѕвезда поставена во бел круг. Според специјализираниот портал „НК њуз“, белите линии што го одвојуваат централното црвено поле од сините рабови ќе бидат нешто подебели.

— реклама —

Досегашното знаме било воведено во 1948 година, кога со Северна Кореја управувал Ким Ил Сунг, дедото на актуелниот лидер. Во неговото создавање учествувале и советски претставници, кои по Втората светска војна помогнале во воспоставувањето комунистички режим на северот од Корејскиот Полуостров.

— реклама —

Подоцна, севернокорејската пропаганда заслугите за изгледот на знамето му ги припишувала на Ким Ил Сунг, претставувајќи го како симбол на неговата револуционерна борба против јапонската колонијална власт.

Според „Волстрит џурнал“, издолжениот облик на старото знаме понекогаш создавал практични проблеми, бидејќи при веењето ткаенината се набирала и ја прикривала црвената ѕвезда.

— реклама —

Аналитичарите сметаат дека промената не е само естетска, туку може да биде дел од пошироките напори на Ким Џонг Ун да изгради сопствен политички идентитет и да се дистанцира од наследството на татко му и дедо му.

Во последните години тој направи значајни промени и во односот кон Јужна Кореја. Во 2023 година се откажа од дотогашната политика на мирно обединување на двете Кореи, почнувајќи да ги претставува како две одделни и непријателски држави. Потоа Северна Кореја започна да ги отстранува изразите поврзани со обединувањето од официјалните документи и државните симболи.