Германскиот канцелар и претседател на Христијанско-демократската унија (CDU), Фридрих Мерц, оцени дека победата на Алтернатива за Германија (AfD) на изборите во покраината Саксонија-Анхалт претставува сериозен потрес за неговата партија, но истовремено ја отфрли можноста за каква било соработка со крајнодесничарската партија.
„Имаме силен устав во Германија и силни механизми со кои можеме да го браниме од деснорадикална влада, но и покрај тоа, станува збор за тектонски удар врз нашиот партиски систем“, рекол Мерц на затворена седница на претседателството на CDU.
Мерц призна дека резултатот во Саксонија-Анхалт ја потресол CDU, која во споредба со изборите пред пет години го преполовила својот резултат. AfD, од друга страна, освои околу 44 отсто од гласовите.
„Овој резултат ја потресе CDU до темел и не можеме едноставно да продолжиме како ништо да не се случило. Тоа се однесува и на сојузната влада“, рекол Мерц.
Тој оцени дека CDU во источногерманската покраина „не воспоставила емоционална поврзаност со гласачите“.
Мерц посочил и дека AfD успеала да мобилизира голем број гласачи кои досега не излегувале на избори. Сепак, категорично ја отфрли можноста за соработка со партијата.
„Тоа е партија која сака да ја уништи CDU и затоа со неа е невозможна каква било форма на соработка“, изјавил Мерц.
