Мерц се закани со блокада на буџетот на ЕУ ако сите членки не се обврзат да ја финансираат Украина

Германија би можела да го блокира усвојувањето на следниот седумгодишен буџет на Европската Унија доколку сите земји членки не преземат обврска за заедничко финансирање на Украина во 2027 година и во наредниот период. Ова го најавил германскиот канцелар Фридрих Мерц, пренесува „Фајненшл тајмс“.

Во писмо испратено до претседателот на Европскиот совет, Антонио Кошта, Мерц ја условил германската поддршка за буџетот на ЕУ за периодот од 2028 до 2034 година со договор за заедничко покривање на финансиските потреби на Украина. Според процените, Киев следната година би можел да се соочи со недостиг од 70 милијарди евра.

— реклама —

Мерц бара сите земји членки, без исклучок, правично да учествуваат во обезбедувањето на потребните средства, нагласувајќи дека тоа е клучен услов и за преговорите за другите финансиски прашања во Унијата.

— реклама —

Германскиот канцелар инсистира и на воспоставување долгорочен финансиски механизам со кој Украина ќе добие сигурна поддршка од 2028 година, вклучително и покривање на каматите за веќе преземените обврски.

Унгарија, Словачка, Бугарија и Чешка досега сигнализирале дека не сакаат да учествуваат во дополнителното финансирање на Киев. Унгарија, Словачка и Чешка минатата година добиле изземање од обврската за плаќање камати на заемот од 90 милијарди евра.

— реклама —

Против продолжување на поддршката за Украина се изјаснила и Марин Ле Пен, која, според анкетите, е меѓу водечките кандидати пред претседателските избори во Франција во април. Таа најавила дека, доколку победи и го наследи Емануел Макрон, ќе ја прекине помошта за Киев, освен оперативната поддршка и обуката на украинските војници.

— реклама —

Прашањето за финансирањето на Украина се отвора во време кога земјите членки водат сложени преговори за новиот седумгодишен буџет на ЕУ. Германија е најголемиот нето-придонесувач во заедничката каса, додека четирите земји што се против дополнителни издвојувања се нето-кориснички на европски средства.

Барањето на Мерц доаѓа пред неформалната средба на лидерите на ЕУ во Даблин, на која, на негово барање, се очекува да се разговара за финансиските потреби на Украина.