Мерц бара од Трамп да не ги исклучува Европа и Украина од преговорите со Путин

Германскиот канцелар Фридрих Мерц го повика американскиот претседател Доналд Трамп да не ги изненадува европските сојузници за време на очекуваните разговори со рускиот претседател Владимир Путин за Украина, кои треба да се одржат следната недела во Кина.

— реклама —

Мерц, кој престојува во Даблин, изрази загриженост дека би можело да се повтори сценариото од самитот на Трамп и Путин на Алјаска, кој европските лидери го сметаа за можен пресврт во напорите за завршување на војната во Украина.

„Некои овде во Даблин стравуваат дека би можело да се повтори сценариото од Енкориџ. Затоа сакам многу јасно да ја пренесам нашата порака до Соединетите Американски Држави: ве молиме, без изненадувања. Продолжете да дејствувате како дел од тимот на Европа и тимот на Украина“, порача Мерц.

— реклама —

Германскиот канцелар настојува да обезбеди лидерите на Европската Унија, во рамките на преговорите за долгорочниот буџет на Унијата, да се обврзат на продолжување на поддршката за Украина. Тој соопшти дека неговиот предлог добил широка поддршка, но дека конечниот договор сè уште е далеку.

— реклама —

По средбите на американски и руски претставници во Абу Даби оваа недела, во наредните недели се очекува почеток на конкретни мировни преговори, во кои за првпат би требало да учествуваат и европски претставници.

Мерц ги отфрли руските барања европската безбедносна архитектура да биде во средиштето на преговорите, посочувајќи дека таа веќе постои во рамките на НАТО.

— реклама —

Според него, претстојните разговори треба да се насочат кон прашањето како ќе се гарантира безбедноста на Украина по постигнувањето мир, но првиот чекор, како што нагласи, е воопшто да се постигне мир.