Мерц од Киев до Путин: „Запрете ја оваа бесмислена војна, подготвени сме за разговори“

Германскиот канцелар Фридрих Мерц од Киев упати директен апел до рускиот претседател Владимир Путин да ги запре нападите врз Украина и да покаже подготвеност за преговори.

— реклама —

Мерц во украинската престолнина пристигна во период на засилени руски напади, при што во Киев се огласуваа сирени за воздушен напад и се слушаа експлозии. Тој порача дека нападите врз цивилното население мора веднаш да престанат.

„Претседателе Путин, запрете ја оваа бесмислена војна! Подготвени сме за разговори, подготвени сме да разговараме за завршување на оваа војна. Но, овие варварски напади врз цивилното население на Украина мора да престанат“, порача Мерц.

— реклама —

Покрај политичкиот апел, германскиот канцелар најави нов пакет помош за Украина во вредност од околу 1,35 милијарди евра. Од таа сума, околу една милијарда евра ќе бидат наменети за воена помош, додека дополнителни 350 милиони евра ќе се искористат за поправка на енергетската инфраструктура оштетена во руските напади.

— реклама —

За време на посетата се разговара и за продлабочување на соработката меѓу Германија и Украина во одбранбениот сектор, вклучително и преку заедничко производство на дронови.

Според германската влада, посетата на Мерц има цел повторно да ја потврди поддршката за Украина, додека Берлин ја нагласува важноста на нејзината безбедност и на Украина како суверена држава.

Апелот за преговори доаѓа во период кога дипломатските напори за прекин на војната сè уште немаат доведено до траен договор. Во меѓувреме, Киев најавува удари врз руската нафтена инфраструктура како одговор на руските воздушни напади, додека Москва предупредува дека ќе ги засили своите напади.