Речиси четири милиони германски гласачи денеска гласаат на покраинските избори во Берлин и Мекленбург-Западна Померанија, во изборен ден што се следи со големо внимание и поради политичкиот притисок врз канцеларот Фридрих Мерц и неговата Христијанско-демократска унија (ЦДУ).
Околу 2,5 милиони луѓе имаат право на глас во Берлин, а речиси 1,3 милиони во Мекленбург-Западна Померанија. Гласачките места се отворени од 8 до 18 часот, по што се очекуваат првите проценки на резултатите. Мерц за вечерва свика состанок на раководството на ЦДУ.
Канцеларот претходно го откажа планираното патување во Њујорк и учеството на Генералното собрание на Обединетите нации. Од германската влада беше образложено дека неговото присуство во Берлин е неопходно во периодот на покраинските избори.
Особено внимание е насочено кон Мекленбург-Западна Померанија, каде што покраинската влада ја предводи премиерката Мануела Швезиг од Социјалдемократската партија на Германија (СПД). Според последното истражување на ЗДФ, СПД има 37 отсто поддршка, АфД 36 отсто, а ЦДУ шест отсто. Друга анкета, на „Инфратест Димап“, покажува 38 отсто за АфД, 33 за СПД и седум отсто за ЦДУ.
Резултатите од анкетите ја ставаат ЦДУ во близина на изборниот праг од пет отсто. Доколку партијата не го достигне прагот, би останала без пратеници во покраинскиот парламент. На изборите во 2021 година СПД освои 39,6 отсто, а АфД 16,7 отсто од гласовите.
Во Берлин, според последното истражување на ЗДФ, Левицата има 22 отсто, ЦДУ 20, АфД 18, Зелените 15, а СПД 12 отсто. Истражувањето е направено меѓу 14 и 17 септември, на 1.611 избирачи, а ЗДФ нагласува дека станува збор за моментална слика на расположението, а не за прогноза на изборниот исход.
Изборите во Берлин се значајни и за покраинската ЦДУ, чиј лидер Каи Вегнер е градоначалник на главниот град од 2023 година. Во исто време, анкетите покажуваат зголемена поддршка за АфД, додека водечките партии ја исклучуваат можноста за коалициска соработка со неа.
Денешното гласање следува само две недели по изборите во Саксонија-Анхалт, каде што АфД освои речиси 44 отсто од гласовите, додека ЦДУ доби околу 17 отсто. Тој резултат дополнително ја зголеми внимателноста во редовите на ЦДУ пред денешните избори.
Мерц е канцелар 16 месеци, а неговата влада, составена од ЦДУ/ЦСУ и СПД, најави економски реформи, зголемување на инвестициите во одбраната и построг пристап кон нерегуларната миграција.
Изборите се одржуваат и во услови на високи цени на горивата. Просечната цена на дизелот во Германија во четвртокот достигна 2,471 евро за литар. Германската влада договори намалување на данокот на бензинот и дизелот од 1 октомври до крајот на годината за 14 центи по литар, односно околу 17 центи со вклучен данок на додадена вредност. Вредноста на мерката е проценета на околу 2,5 милијарди евра.
Владата најави и разговори со нафтените компании за можно привремено ограничување на цените на горивата од 1 јануари 2027 година.
