Мерц со порака до Иран: Прекинете ја блокадата на Ормускиот Теснец и престанете со дестабилизација

Германскиот канцелар Фридрих Мерц го повика Иран да престане со дестабилизирање на регионот и да не го проширува конфликтот кон Ирак преку вооружените групи што ги поддржува.

Мерц ова го изјави во Берлин на заедничката прес-конференција со ирачкиот премиер Али ел Заиди, со кого разговараше за регионалната безбедност, последиците од војната меѓу САД и Иран и блокадата на Ормускиот Теснец.

— реклама —

„Техеран мора да престане да ги поддржува посредничките групи низ регионот. Последиците од тоа ги гледаме секојдневно. Исто така, го повикуваме Иран дополнително да не го проширува конфликтот кон Ирак“, порача Мерц.

Германскиот канцелар побара Иран конечно да ја прекине блокадата на Ормускиот Теснец и да ја запре, како што наведе, својата воена нуклеарна програма.

— реклама —

Тој додаде дека Берлин ја поддржува иницијативата на ирачката влада за разоружување на милициите под влијание на Иран, како и нејзините напори за воспоставување мир и безбедност.

— реклама —

Мерц и Ел Заиди разговарале и за состојбата во Црвеното Море, каде што, според германскиот канцелар, Хутите ја прошириле контролата долж јеменскиот брег и го зазеле островот Мајун во теснецот Баб ел-Мандеб.

„Хутите сега контролираат стратешки позиции околу теснецот Баб ел-Мандеб и напаѓаат енергетски постројки во Саудиска Арабија. Тоа дополнително ја отежнува состојбата на меѓународните енергетски пазари“, рече Мерц.

Тој порача дека меѓународната заедница не смее да дозволи Хутите да го загрозуваат поморскиот сообраќај во Црвеното Море и дека ЕУ, заедно со партнерите во регионот, разговара за заеднички чекори за придонес кон завршување на конфликтот.

Во однос на иднината на германската воена мисија во Ирак, Мерц потврди дека таа завршува на 30 септември, на барање на ирачката влада. Сепак, Берлин е подготвен да продолжи со воената соработка со Ирак во други облици, доколку за тоа постои интерес.