Денеска ќе се знае колку ќе чинат горивата во следните седум дена, откако Регулаторната комисија за енергетика ќе ја направи новата пресметка на максималните малопродажни цени.
Во моментов, литар ЕУРОДИЗЕЛ се продава по максимална цена од 104,50 денари, ЕУРОСУПЕР 95 чини 99 денари, а бензинот од 98 октани 101 денар. Овие цени се во сила од 22 септември.
При пресметката се земаат предвид просечните берзански цени на дериватите во изминатите седум дена, курсот на денарот во однос на доларот, премиите, транспортните трошоци, трговската маржа, акцизата и другите давачки, како и ДДВ.
Најголем притисок има кај дизелот, поради растот на цените на светските пазари и нарушувањата во снабдувањето од Блискиот Исток и Русија.
Дополнително, на полноќ истекува владината мерка со која ДДВ за горивата беше намален од 18 на 10 проценти. Засега нема официјална одлука дали намалената стапка ќе биде продолжена.
Доколку сегашната цена на дизелот од 104,50 денари само математички се пресмета со ДДВ од 18 наместо 10 проценти, без промена на останатите ставки, разликата би била повеќе од седум денари за литар. Сепак, тоа не значи дека дизелот автоматски ќе поскапи за толку, бидејќи денеска ќе се пресметаат и берзанските цени и сите останати елементи.
Така, конечната цена ќе зависи од две клучни одлуки – колкав ќе биде седумдневниот просек на цената на дизелот и дали Владата ќе го продолжи намаленото ДДВ.
