Ќе се анализираат цените на струјата и блок-тарифите: Македонија подготвува енергетски реформи

Постепеното приспособување на цената на електричната енергија на пазарно ниво, заедно со мерките за заштита на граѓаните од енергетска сиромаштија, е главната тема на експертската мисија што Министерството за енергетика, рударство и минерални суровини ја организира во соработка со Европската комисија.

Мисијата се спроведува преку европскиот инструмент TAIEX и ќе трае до 13 ноември, а во неа учествуваат експерти од Грција и Бугарија, претставници на домашните институции, Регулаторната комисија за енергетика и граѓанскиот сектор.

— реклама —

Во фокусот е реформата предвидена со Реформската агенда за периодот 2024–2027 година, која опфаќа постепено усогласување на цената на електричната енергија со пазарните услови, но и воспоставување мерки за справување со енергетската сиромаштија.

Според Министерството, во текот на експертската мисија ќе се анализираат постојната регулатива за малопродажните цени на струјата, блок-тарифите како механизам за заштита на потрошувачите и европските модели за поддршка на домаќинствата и малите потрошувачи.

— реклама —

Посебно внимание ќе биде посветено на начините за препознавање и заштита на граѓаните кои имаат тешкотии да ги покријат трошоците за електрична енергија.

Од Министерството наведуваат дека веќе се направени чекори во оваа насока, меѓу кои воведување законски дефиниции, донесување методологија за мерење на енергетската сиромаштија и спроведување годишни програми за заштита на ранливите потрошувачи.

Експертите од Грција и Бугарија ќе ги претстават искуствата од нивните земји, вклучително и краткорочните и долгорочните мерки за финансиска и социјална поддршка, подобрување на енергетската ефикасност и следење на енергетската сиромаштија.

— реклама —

Во разговорите ќе бидат вклучени и Министерството за социјална политика, демографија и млади, Државниот завод за статистика и организацијата „Хабитат Македонија“.

Целта, според Министерството, е да се воспостават одржливи механизми за заштита на ранливите потрошувачи и да се исполнат обврските од европската Реформска агенда.

— реклама —

Во соопштението не се наведува кога би започнало евентуалното дополнително приспособување на цените на електричната енергија, ниту колкави би биле промените во сметките на граѓаните.

Засега станува збор за експертски разговори и анализа на можните мерки, а не за објавена одлука за поскапување на струјата.